Ka Maia Multispeciality Clinic kawa em ha Khliehriat harood u sarok National Highway marjan ka Khliehriat Police Station, East Jaiñtia Hills District, toh ka thaw wa ye ki bru u yoh yei sumaar kjut wa boonjait lyngba ki Doctor Specialist kam ki Gynecologist, ENT, Ophthalmologist, ki summar Physiotherapy wa kiwi, najrong wa ye leh u yoh waroh ki jait Test snaam, lait noh ka X-Ray, Scanning, Ultrasound kiwa daw poi hadien.
Ki Specialist u wan ki katkam i por yong ki hi tangwa u Dr. Nichwa LS Nongtdu kam u General Consultant & Diabetologist u em bait u man-ka-sngi yow pait u sylli yei kjut i chitom ki bru wa wan.
Heini u pait leh yei jait kjut kam ki kynja Stroke, i ku BP, kiwa em Diabetes wa boon jait, i leh Physiotherapy nadooh ka Neuro deiwa em leh ki Doctor wa leh yei pooid bru, ki Doctor neibynta ki kynthai, neibynta ki khmat, ki chkoor, ki Doctor yong ki khynnah wa kiwi.
Ya kani ka Clinic da wan wai paidbah ya ka ynne ka sngi da u Kyrmen Shylla, Montri sorkar uwa man leh u MLA ka thaaiñ hei emlang u DC ka East Jaiñtia Hills, u Abilash Baranwal, u W. Nongtdu, OC Khliehriat Police Station, u Fr. Ioanis Pakma, Parish Priest ka Khliehriat wa kiwi.
Ha ka yalang wa pynlai da ka Dr. Junita Kyndait, u Director ka Maia Multispecialty Clinic, u Dr. Nichwa LS Nongtdu kam uwa da dooh noh yaka kjat tidiang la 6 bnai kattu nei jia tyrrah kari, hawa klam yahkhmat ong u i daw wa sdang u ya kani ka Clinic toh wym ye de u lai cha jngai kamwa jooh, wei yosar leh toh iwa da booh u Blai wow jia ya oo yow neh u ha chnong neibynta i myntoi ki paidbah ka East Jaiñtia Hills District heiyatoh wa i chait i khiah.
Neiliang u DC ka East Jaiñtia Hills yooluti u wa kani ka Clinic u ye ko wow e i chakri wa bha tam ya ki paidbah.
Katwa u Kyrmen Shylla kam u kongsan ong u, “Hei lai luti kam ki bru ym ye u tip yei thmu u Blai, boi ini i jia hei im u Dr. Nichwa leh toh wa u Blai yoo u yei sap yong oo yow em u ha kani ka thaaiñ yow yada u ya ki hajar ki mynsien wa emkaam yei chakri yong oo, kamtæ ym e laad u wow lai u cha jngai”.
Da ong u leh wa neiliang yong oo kam uwa mihkhmat smat u wow yakrehlang kat iwa ye neibynta iwon iwon i emkaam ha kani ka Clinic.
Ha kani ka sngi da yoh leh i klam na ka bei u Dr. Nichwa, ka Philis Nongtdu kawa ong wa u khon yong ka da lait u nei yap te yoh won u wow sdang yei im lyngba kani ka Clinic neibynta u chakri ya ki bru ka thaaiñ East Jaiñtia Hills.
