Ka seiñ HITO ha ka kyrwoh wa da phah da ong ko wa ka Meghalaya State Job Reservation Policy toh kawa da wanrah da ka sorkar nadooh ka 12-01-1972 yow yada yeiwa emkaam ki jaitbru ri-loom ka jylla Meghalaya.
Wei katkam kani ka Job Reservation Policy hadooh katni da booh bhah 40% i kreh sorkar neibynta ki Khasi wa Jaintia katwa 40% won neibynta ki Garo wa 5% won neibynta kiwi ki Scheduled Tribe wa Scheduled Caste ka Meghalaya.
Chooh chooh da ong wa kani ka Reservation Policy hawa pynmih nyngkong ya ka da kheiñ katkam i boon paaid tangwa ini ymem da leh hok katkam i boon paaid ki Khasi, Jaiñtia wa Garo neibhah heitu i por kiwa chim yei rai ymem leh ki katkam ka yukheiñ wa da yoh na ka Census.
Da ong wa katni won katkam ka Census ha u 2011, ki Khasi wa Jaiñtia da em ki 14,11,775 ngut katwa ki Garo won 8,21,026 ngut iwa pynyoo wa ki Khasi-Jaiñtia ymem da yoh ki yei bhah yong ki hapoh kani ka Reservation Policy wa katni. Kamtæ da ong ini da pyndooh mynsien ko ya ki Khasi-Jaintia wa da chah knieh i hok ki khamtam ki khynroo kyllood kiwa da maad yeini khlem da leh bakla ki iyi iyi.
Heiyatoh wa i pynkrehkaam ya ka Roster System lyngba ka Office Memorandum, da ong wa da leh yeini khlem da paitbniah yei boon paaid kamjooh iwa duna wa iwa bha.
Kamtæ da ong wa em sakhiat ka daw wa biang yei wym hun ki Khasi-Jaiñtia ya kani ka Job Reservation Policy kawa nadooh u 1972 wei da emkaam wow pait biang deiwi katkam wa boon paid.
