I yaklam yasuk hapyrdi ki Pnar wa ki Karbi wa em ha khappood ka Meghalaya wa Assam da pynman ynne ha Khanduli BOP deiwa emlang kiwa mihkhmat na waroh arliang.
Neiliang ki bor District ka West Jaiñtia Hills da mihkhmat da u Assistant Commissioner, u W.K. Kharbuli, MCS, u DSP (L/O), u A.J. Sangma, u BDO ka Namdong C&RD Block, u B. Sungoh katwa na West Karbi Anglong District won da mihkhmat da u Assistant Commissioner uwa man leh kam u Border Magistrate, u Rakesh Thakur wa u Circle Inspector, u Z. Baithanglangdi.
Neiliang u W.K. Kharbuli da ong u wa ka thong yong kani ka yalang toh wow wanrah yei ya sñiawthooh hapyrdi kini ki arliang yow em biang i suk i saiñ ha kani ka thaaiñ deiwa ong leh wa yooluti u i chongsuk wa da em heini nachwa u wanpoi biang i yow ye u pteiñ biang yei khayi pateiñ wa kiwi de ki kaam wa emkaam.
Da kyntu u leh ya waroh arliang wow chim kabu ya kani ka yalang wow chim ya ki rai kiwa daw neh yow pynkhlan yei chongsuk wei ya sñiawthooh ha kani ka thaaiñ.
U Rakesh Thakur da ong u wa emkaam bha wow yaklam neipor cheipor hapyrdi ki ar jaitbru yow pynkhlan yei yatoh wei ya sñiawthooh lada em iyi iyi i wym ya sñiawthooh wei da ong u leh wa kam kini ki yaklam yasuk pynoo wa em i thrang wow ya pynbait ya iwon iwon i eh yow wanrah yei suk ha ki sngi wa daw wan leh kamjooh.
Kiwa yahkhmat na waroh arliang da yaklam ki yei long i man wa katni wei da chim yei rai wow kreh ki yow pynneh yei suk i saiñ ha kani ka thaaiñ.
