Ka Rymbai Iawpynsin waka Mawlai SC da jop suk ki ynne ka sngi ha ka Meghalaya State League 2023 heiwa da yoh ki yei jop deiwa thap mar 5-1.
Ha kiwi won ki yalehke, ka Chipakkore FC da yoh ko yei jop wa nyngkong ha ka Group D wei i jop wa ar ya ka Seven United hapoh ka Group C.
Ka Chipakkore da jop ko da 5-2 ya ka Atong Matgrik FC ha Tura katwa ka Seven United da jop ko ya ka Pyndengre da 2-1 ha Mawkyrwat.
U Arkidalang Myrthong (17′) wa u Teilang Kurbah (47′) da thap ki ya ka Seven United, katwa u Wanpyrkhat Iawphniaw (90’+2) da thap u ya ka Pyndengrei chwa u kut. Ya ki 5 kool ka Chipakkore da thap da u Balkan Marak (20′), Samuel Shadap (52′), Sidartha Rabha (63′) wa u Baiarjingmut Syngkli (77′, 82′). Ya ka Atong Matgrik da thap da u Senwal Ch Marak (4′) wa u Walsrang Ch Sangma (37′).
Ha Jowai won, u Hesmiki Rymbai da yoh u ya ka Hat-Trick ya ka Rymbai deiwa thap ha ka minit wa 5, 82 wa 84 deilang wa ki chi kool na u Obadaia Bareh (19′), u Niwan-o Bareh (72′) katwa u Paiabanteiskhem Bhoi (90’+1) da thap u ya ka chi kool ka Sein Pynbhalang.
Ka Rymbai da em ko 9 Point iwa man kat jooh waka Rangdajied United waka Ladthadlaboh heiwa ka da yaleh soo sien katwa ka Rangdajied waka Ladthadlaboh won mar le sien. Ka Sein Pynbhalang da pteiñ ko wow em ha tre dooh heiwa ynne da yoh ko wow thap ya ka kool wa nyngkong.
Ha Shillong, ka Mawlai leh da jop ko da 5-1 wei kam ka Rymbai da chah thap ko chi kool chwa wow kut ka yalehke.
Ya ka Mawlai da thap da u Robert Khongriah (19′), u Brolington Warlarpih (21′) wa u Donlad Diengdoh (39′) ha ka kylla step. Ha ka kylla miet da thap da u Remark Kharmalki ha ka minit wa 55 wa 79.
Ka Mawlai chwa u kut ka yalehke da yoh Red Card uwa yang kool ko u Neithovilie Chalieu heiwa da hap mih noh da u Donborlang Nongkynrih u wym ye u pynsangeh ya ka chi kool ka Umkseh wa da thap da u Marcellino Khongsit (90’+5) lyngba ka Penalty.
Ka Mawlai daw dooh ko ya u Chalieu ha ka yalehke wa bood yong ka tangwa da skem i thaw ko ha ka Group A deiwa jop ha waroh le tylli ki yalehke wei da yoh ki 9 Point.
Ki yalehke mynstep:
Group A, Shillong- Langsning Vs Umrit, 3:00 PM
Group B, Jowai- Ladthadlaboh Vs Mulait United, 2:30 PM
Group C, Mawkyrwat- Lumdiengngan Vs Shillong Lajong, 3:00 PM
Group D, Tura- Khliehmawlieh Youth Club Vs Selsella Sports Association, 3:00 PM
