Kawa dang ksoh yei naam jop ya ka Meghalaya State League katæ ka Shillong Lajong, ynne da sdang ko wow yakhun yow ksoh biang yei naam Champion deiwa jop da 10-0 ya ka Lumdiengngan ha ka Group C wa da pynman ha madan MDSA, Mawkyrwat.
Ha kiwi won ki yalehke, ka Langsning da jop ko ya ka Umrit da 9-1 ha ka Group A wa da pynman ha madan ka MFA ha Shillong, katwa ha Jowai won, ka Ladthadlaboh da yoh nyngkong ko ha ka Group B deiwa jop da 3-0 ya ka Mulait United. Ha Tura won, ka yalehke hapyrdi ka Khliehmawlieh Youth Club waka Selsella Sports Association da kut ko da 2-2 hapoh ka Group D wa da pynman ha madan Chandmari.
Ya ki kool ka Lajong da thap da u Babysunday Marngar san tylli (25′, 31′, 42′, 46′, 49′) katwa ya kiwi ki kool da thap da u Wadajied Kynsai Ryngkhlem (4′), u Pynche Tyngkan (16′), u Atlanson Kharmaw (70′), u Ioanis Suchen (77′) wa u Hardy Cliff Nongbri (90’+2).
Ka Lajong da hap ko wow sdang slem u chimbynta ha kani ka MSL 2023 neidaw wa chimbynta ko ha ka Second Division ka All India Football Federation chwa ynne ka sngi.
Ya ka Langsning won da thap kool da u Dauruhipaia Pale (3′, 45′, 87’), u Arnesius Marwein (5′), u Kordor Dkhar (12′, 42′), u Kynsaibor Lhuid (24′) wa u Federick Wahlang (52’) katwa ya ka chi kool ka Umrit da thap da u Wanroyshang Sangma ha ka minit wa 68.
Ha Jowai won, ya ka kool wa nyngkong da thap ha ka minit wa 40 ya ka Ladthadlaboh da u Stephanson Pale lyngba ka Penalty. Mar ya sdang ka kylla miet da yoh biang ka Ladthadlaboh u thap ya ka kool wa ar lyngba u Nickyboy Swer wa sa chi kool na u Stephanson Pale ha ka minit wa 60 kawa da neh hadooh wa kut ka yalehke.
Da ini mut i wa ka Ladthadlaboh da yoh nyngkong ko ha ka Group B deiwa yoh 10 Point tangwa ka Rangdajied United ye ko wow yoh nyngkong biang lada jop ko ya ka Rymbai Iawpynsin mynstep. Ka Mulait ynne da yoh ko yei rem hadien wa jop arsien na ar tylli ki yalehke.
Mynstep daw em du kawi donhi ka yalehke, heiwa ka Rangdajied United daw yachem ko waka Rymbai Iawpynsing ha Jowai heipor 2:30 i sngi.
