Ha ka yachemlang yong u Montri Rangbah ka Assam wa u Montri Rangbah ka Meghalaya wa da pynman ynne ka sngi ha Guwahati yow pynbait ya u pood neibynta ka wat wa ar, da rai wow lai hiar lang ki waroh arngut cha khappood ka West Jaiñtia Hills waka Karbi Anglong yow yarap u wanrah yei chngaaiñ wei i skem ha ka imlang sahlang hadien wa da mih i kynaad hapyrdi ki Pnar wa ki Karbi wa sah ha kani ka thaaiñ.
Hawa yaklam wa kiwa thoh khubor hadien kani ka yalang wow pynbait ya u pood yong ki 6 tylli ki thaw wa dang sah, neiliang u Montri Rangbah ka Assam, u Himanata Biswa Sarma da ong u wa nadooh myntu ka sngi, ki Regional Committee yong waroh ki ar tylli ki jylla daw lai hiar noh ki cha waroh kini ki thaw wa em i kajia pood, wei chwa wow kut u Naiynru uni u snem daw hiar lang u wa u Montri Rangbah ka Meghalaya cha Karbi Anglong wa Jaiñtia Hills wa dang em i kulmar hadooh katni yow lai syllok wei wow lai pynchngaaiñ.
Da ong u leh wa ki bru na waroh arliang daw sñiaw chngaaiñ ki wei daw kular ya ki wow pynbait noh ya waroh i ya kajai deiwa kynmoo leh ya i yatoh lok wa i mynsien wa yajan hapyrdi ki bru ka Assam wa Meghalaya.
Da kyrmen u leh wow pynbait yeiwa kajia deiwa yaklam wei deiwa em i chaniah uwi ya uwi.
Heiyatoh wa ki Regional Committee, da phah ya ki wow e ki ya ki Report yong ki chwa wow kut u Naiynñiaw wei hadien itæ daw yachem biang ki Montri Rangbah.
Neiliang won u Montri Rangbah ka Meghalaya, u Conrad K Sangma da ong u wa ini toh i sdang yow chem kammon wow pynbait ya u pood kini ki 6 tylli ki thaw wa dang sah.
Da pyntip u wa da phah ya ki Regional Committee wow lai thooh bniah yow chem yeiwa sakhiat kamwa da leh ha ka wat wa nyngkong deiwa lai yaklam wa waroh kiwa daw chah ktah kamjooh wow phah smat ya ka Report wei da yooluti u daw em ki thaw wa daw smat u pyndep ya ka Report wei daw em leh kiwa daw chimpor.
Da ong u leh wa neiliang ki kam ki Montri Rangbah da kyntu ki ya kiwa chong chnong ha khappood ka West Jaiñtia Hills wa ha West Karbi Anglong wow pynneh yei suk i saiñ deiwa kular u leh wow wanrah yei pynbait pood.
“Nga sñiawskem O wa hei yahkhmat u Montri Rangbah ka Assam deilang waka sorkar India daw chem ya ka laad ka luti yow pynbait deiwa chaniah wei deiwa yatoh lok,” da khana u leh wa da phah ya ka Survey of India wow pteiñ yei leh sorjamin (Survey) neibynta ki 6 tylli ki thaw wa da dep ya pynbait pood kamjooh wow pyndep ya ka Survey yong ki.
