Kam chibynta wow yaleh pyrchah yei kjut Cancer, da pynman yei pynsñiawthooh deiwa khut ya kiwa yahkhmat niam ka Meghalaya deiwa emlang ki bru ka chnat i chait i khiah ka sorkar jylla wa pynman da ka Department of Surgical Oncology, NEIGRIHMS ha ka 24 tarik uni u bnai.
Hawa e ya ki kyntien wai phang, u Dr. Nalin Mehta, Director, NEIGRIHMS, da ong u wa ka Meghalaya da tip ya ka kam ka “Cancer Capital of India” deiwa em ko boon dooh kiwa yoh Cancer heiwa da em 131 ngut kiwa yoh ha man ka chi lak ngut, kamtæ da emkaam wow pynsñiawthooh paidbah chaphang kani ka kjut kamjooh ki laad yarap.
Da ong u leh wa i embynta kiwa yahkhmat niam daw yarap bha ko wow pynsñiawthooh paidbah neibhah ki em ki i bor wow leh yeini heijooh i por da ong wa toh u pynemkaam leh dei miat ya ki rynsan pathai khubor wa em katni deiwa suk ki khynnah kamjooh ki waheh u sñiawthooh.
U Dr. Caleb Harris, Associate Professor, Surgical Oncology, da ong u wa ka Meghalaya da yoh ko ya ini i naam wa boon dooh kiwa yoh Cancer wei kiwa boon toh kiwa yoh ya ka Esophageal Cancer kawa ktah ya u rdang hadooh u kpoh wei da em 70 ngut na man ka chi lak ngut kiwa yoh yeini iwa man 10 chah na iwa jia hapoh ka ri. Da ong u leh wa kani ka Esophageal Cancer toh kawa da jia neidaw wa baam duma, i dih duma, dih sikret, dih biri, i baam kwai kamtæ ini waroh toh iwa ye wow yada.
Neiliang u Sampath Kumar IAS, Principal Secretary and Commissioner, Health & Family Welfare, Govt. Meghalaya, da pynchlur u ya kiwa yahkhmat niam wow pynman yei pynsñiawthooh paidbah wei wow yalap yow dam noh u pynemkaam duma, u dih sikret, u dih kiad wei wow baam kwai heijooh i por u pynchlur deiwa im dei chait i khiah.
Neiliang u Rev. Fr. Richard Majaw, Secretary ka Shillong All Faith Forum wa u Rev. Edwin Harris Kharkongor, Secretary, Khasi Jaintia Christian Leaders Forum da ong u wa yow wanrah yei kylla emkaam leh u pynkylla yei rukom pyrkhat ki bru wei da emkaam leh ya ki bru kiwa bien u man kam ka nongmuna ya kiwi wow bood ki kiwa bien u yieñ pyrchah ya u duma, kiad wa u kwai.
Ha kani ka yalang da emlang leh kiwa mihkhmat ka Central Puja Committee, Shillong Muslim Union, Shillong Buddhist Association, Unitarian Church wa kiwi de ki balang niam.
Ha kani hi ka yalang da yoh leh yei khana na kawi ka manyung yei eh wa maad ki kamjooh kammon da leh hadooh wa jop uwa ha-yung ki ya ka Cancer.
Da chim leh ya ka rai wow pynbna ya ki thaw mane ki thaw leh niam wow man noh ki kam ki “Tobacco-Free Zone”.
Da pynkut ya ka yalang da ki kyntien e khublei na u Dr. Star Pala, Additional Professor of Community Medicine, NEIGRIHMS.
