Ka United Democratic Party (UDP) da chim ko yei rai wow yaklam wa ka sorkar yei pynkrehkaam ya ka Roster System wa toh u man ko neini chakhmat ymtoh deiwa kyruiñ dien nadooh u snem 1972.
Ka UDP da chong pynman ko ya ka yalang wa jhan ynne i miet wow yaklam hawa yatoh wa i long i man iwa da mih ha kini ki sngi na i daw yong ka Reservation waka Roster.
Hawa klam cha ki laad pathai khubor, u President ka UDP, u Metbah Lyngdoh da ong u wa kamwa man katni ka bhah toh 40-40 ya ki Khasi-Jaiñtia wa Garo, tangwa i thung kreh kamwa da yoo ym em man ko katkam katai ka bhah.
Da ong u wa neiliang ka Party da ap ko yei pynche yong ka sorkar hajrong i pynkrehkaam ya ka Roster, tangwa neiliang ka Party ka sñiaw ko wa dang em sa kattu katni kiwa dang emkaam wow paan pynche hanla ha katu ka sngi da em ko hei pynche na ka sorkar.
Hawa yatoh wa i pynbait thymme ya ka Reservation Policy, u Metbah da ong u wa kam ka Party chwa u lai cha ka Election leh da chim wa ya ka Reservation Policy wa toh u pynthymme biang wei daw chimkhia wow yaklam wa ka sorkar.
