Ynne ka sngi ka Jaiñtia Coordination Committee for Reservation Policy (JCCRP) kawa man ka satri ki seiñbhalang na Ri Jaiñtia wa ki Synjuk Waheh Chnong da pynman ko ya ka yakhih chong kyllaiñ myngngor ha Iawmusiang, Jowai wow dawa pynlkylla namo wow sylli biang ya ka Reservation Policy kamjooh ka Roster System.
Ha kani ka yalang da wan chimbynta da ki spah ngut ki paidbah wa kynthup leh ya ki bru chemphang wa kiwi kiwi deiwa ksoh ya ki kot-rben wa thoh ya ki kyntien dawa na ka sorkar.
U Khroo Lamsalanki Pariat hawa e yei klam da kyntu u ya ki waheh chnong wow pynman ya i pynsñiawthooh paidbah heiyatoh wa ini i kaam ha ki dong ki chnong yong ki khnang wa kani ka kaam u man ko kawa jop wei kawa poi thong.
Ha ka yalang kawi ka manbei hawa e yei klam da kular ko wow krehlang wa ki seiñbhalang wei da kyntu ko ya ki paidbah wow synñiang poisa yarap cha ka JCCRP yeiwa u Vice Chairman ka JCCRP, u Treiborlang Suchen da kyntait u wow pdiang ya ka poisa deiwa ong wa emkaam yei kyrchaan donhi yong ki paidbah wow ye ki u kreh chitom sam chaphrang.
Kiwi kiwa da klam ha kani ka sngi toh u Chandame Sungoh uwa da ong u wa ini ymtoh wow wanrah yei sñiawyaphær neibhah i dawa toh neibynta i hok yong i wei ymtip kiwi ki jaitbru (Garo) kammon sñiaw ki neibhah ki Jaiñtia da man kiwa jem wei kiwa yaichah waroh chi kattu.
U President ka KNGCSU da ong u wa sñiawngooh u ya ka Committee da wan ki chaphrang wow dawa sylli biang ya ka Reservation Policy kawa da rim bha kawa da 50 snem tam wei da wan ki wow kyrchaan ya kawon kawon ka seiñ tangwa wan ki kam ki khynroo wow kyrchaan ya ini i thmu wow pynkylla thymme noh ya ka Policy.
