Ynne ka sngi ka Jaiñtia Coordination Committee (JCCRP) kawa man ka satri ki seiñbhalang na Ri Jaiñtia wa ki Synjuk Waheh Chnong da pynman ko ya ka yakhih chong kyllaiñ myngngor ha Iawmusiang, Jowai wow dawa pynkylla namo wow sylli biang ya ka Reservation Policy kamjooh ka Roster System.
Ha kani ka sngi u President ka JSM-Western Region, u N. Ribok Biam hawa e yei klam da ong u wa i pynman ya kani ka yakhih da ki seiñbhalang wa kiwa kitkaam chnong neibhah em ki yei bahkhlieh neibynta ka mynried wa ka pateiñ khnang wow im ka jaitbru deiwa dawa wow sylli biang ya ka Reservation Policy.
Da ong u wa sñiawsih wow yoo neibhah kiwa mihkhmat na Ri-loom Garo pyrkhat ki ya ka jaitbru yong ki katwa kiwa mihkhmat ka Khasi wa Jaiñtia won ym nood ki wow klam hajrong ini deiwa kdaw wa ha ki Manifesto ki Party da booh wow sylli biang ya ka Reservation Policy tangwa hadien wa jop won waroh da mylliñ ki ki.
Chooh chooh da ong u wa em chiboon ki MLA kiwa ong wa chem chitom ki wow klam ya ka Reservation Policy, wei hawa da jied toh u kreh phi ki MLA neibynta iwa eh wa khor ki paidbah kiwa da jied ya ki wei lada ym sñiaw ye wow klam ya ka Reservation Policy su hiar chuki noh ki yow ye u jied da kiwa ye u klam wow kreh yeini i kaam.
Heiyatoh won wa i klam wa pynyaphær jaitbru, da ong u wa i da yaphær chwa i wa ki lok Garo nadooh ka niam ka rukom, i ktien thylliej wei wot i rukom im leh phær i.
Da ong u leh wa hadien i yakhih na Khliehriat wa Amlarem daw chimkhia ka Committee wow rai wow sylli ya ka Reservation Policy wei daw yakhih ko deiwa khor ha ka tayaaw wow wan.
