Hadien wa ban i kjut khlam ki sñiang wa tip kam ka African Swine Fever hapoh ka jylla, kattæ won da em sa i kjut ki masi wa tip kam ka Lumpy Skin Disease (LSD) iwa da ktah ha ki kattu katni ki District ha ka Ri-loom Khasi.
Katkam ka khubor wa da yoh lum, da khana wa hadooh 20 tylli ki masi da yap syndet syndet na ini i kjut ka ha ka chnong Pynthorumkhrah, Shillong wei da suba joor wa kini ki masi da yap ki na kani ka kjut LSD.
Ka sorkar jylla lyngba ka chnat Animal Husbandry & Veterinary, da pyntikna ki wa i yap toh nei kjut LSD ki masi hapoh ka Ri-loom Khasi hadien wa da pynthikna deiwa Test ka National Institute of High Security Animal Disease (NIHSAD), Bhopal.
Katkam i pyntip ka chnat, ka NIHSAD da phah ko ya ka Report ha ka 12 tarik uni u bnai hadien wa da da pait bniah ya ki nongmuna wa da phah na ka jylla nadooh ka 28 tarik u Naitung (Apr), 2023.
Ka chnat da pyntip ko wa ki chnong kiwa da chah ktah ha ini i kjut Lumpy Skin Desease (LSD) kynthup ki ya ka chnong Sumer, Mawlyngkhung, Umpyrdong-Umden, Umkon-Umdem, Saiden-Nongpoh wa Jyntu-Nongpoh kiwa haap hapoh ka Umsning C&RD Block ha Ri-Bhoi deilang waka chnong Rangthong kawa haap hapoh ka Mawkyrwat C&RD Block, South West Khasi Hills.
Kam chibynta wow kdoh u khoom ya ini i kjut, ka sorkar jylla da pynbna ko ya kitai ki chnong kam ki ‘Infected Village’ namo ki chnong wa da yabi i kjut LSD.
Uwi uwa chare Masi ha Pynthorumkhrah da pyntip u wa da dep khut ya ki Doctor ka Veterinary hajrong i yoh kjut ki masi u wei ki Doctor da dep ki wow e Inject deilang wa ki dawai, tangwa ki masi da yap ki na ini i kjut.
