Ka seiñ HYC East Jaiñtia Hills District Circle deilang waka HYC Pamra Unit da lai e dorkhat ki ha u EE ka PWD (Roads) NEC Division yow dawa pynchna ya u sarok wa lai na Khliehriat cha Rymbai CHC uwa da sih bha katni.
Da ong wa uni u sarok toh uwa emkaam bha ya kiwa chong chnong kani ka thaaiñ tangwa katni neidaw wa da joor boon sa ki thlu, ki bynta wa da kaad wei ym madan de u sarok da eh hadooh wow lai luti ki kari.
Ini da ktah ko ya waroh nadooh ki khynnah skur, kiwa lai kreh, kiwa lai khih mylla wei da pynsepai yei por kamjooh leh da pynsih uni u sarok ya ki kari iwa da ktah kylla yei pynpoi ya ki tiar ki tar cha ki thaw sumaar, ki mar ki mata cha ki yaaw ki haat iwa da ktah syndon ya ka khayi pateiñ.
Kamtæ da ong wa neidaw wa uni u sarok toh uwa emkaam bha, da toh wow pynchna smat noh yow pynsuk ya ki paidbah kamjooh yow lait u jia iwon iwon iwa sñiawsih yow chngaaiñ i lai i wan.
