U Montri ka chnat Food, Civil Supplies & Consumer Affairs Department, u Comingone Ymbon deilang wa u Pravin Bakshi, Commissioner & Secretary, Consumer Affairs Department da pynman ki ya ka yalang yow booddien ya ki kaam wa da pynkrehkaam ka chnat wa da pynman ha Pinewood Hotel Shillong deiwa emlang leh ki sahep ka chnat deilang ki DC wa ki SDO ha ka 30 tarik u Naisan.
Ha kani ka yalang da yaklam hajrong kiwa boon ki kaam wa da pynkreh da ka chnat kam ka One Nation One Ration Card (ONORC), i thap pyrtuid hapoh Aadhaar, i pynemkaam da ki kor electronic Point-of-Sale (e-POS), i chim ya ki GPS Coordinates yong waroh ki dukan dai rachon yow suk u pynbait luti kamjooh yow booddien yei lai ki kari wa kit mar rachon ha kylleiñ ka Meghalaya.
Ka One Nation One Ration Card toh kawa da pynkrehkaam hapoh ka jylla yow yarap ya kiwa yoh myntoi hapoh ka National Food Security Act (NFSA) yow suk ki wow lai chim ya u khoo rachon na kawon kawon ka dukan rachon hapoh ka jylla waka ri leh kamjooh deiwa em ki u Aadhaar Number uwa da thap hapoh ka PDS Database iwa mut wa da pynyabi ya ka Card Rachon wa u Aadhaar.
Yow pyntikna wa khooid suba i krehkaam ki dukan dai rachon, da booh ya ki kor e-POS ha kawi pa kawi ka dukan. Kamtæ u Montri da kyntu u ya ki sahep sorkar wow chimkhia ki wow pait yei pynemkaam ya kini ki kor ePOS ha ki dukan rachon yow pyntikna wa uwi pa uwi wa yoh myntoi u yoh ki yei hok yong ki khlem pep wei wow pyntikna wa 100% toh u em pyrtuid ki hapoh u Aadhaar yow lait u dooh bhah ki bru.
U Montri da yaroh u leh ya ka chnat kawa da pyrchang nyngkong wow leh ya ka Online Tracking yow booddien ya u khoo rachon ha East Khasi Hills yow lait nei chah kit tooh u khoo.
