U Montri ka chnat Excise, u Kyrmen Shylla ynne da pynlait u ya ka “Teacher Attendance Monitoring System” kawa man ka App wa nyngkong kam kani hapoh ka jylla wow booddien yei wan skur kiwa sikai heiwa da emlang leh u Deputy Commissioner ka East Jaiñtia Hills District, u A. Baranwal, wa u A.K. Singh, SDO (Sadar), East Jaiñtia Hills District uwa da embynta lyngba ka Video Conferencing deilang wa kiwi ki sahep sorkar wa kiwi wa emktilang. Wei ya kani ka yalang da pynman ha kamra Video Conference, u Deputy Commissioner ha Khliehriat.
Neiliang u Kyrmen Shylla da kyntu u ya kiwa sikai skur wow ya krehlang wa ki bor District lyngba kani ka Teacher Attendance Monitoring App. Da ong u wa lyngba kani ka App daw pynyoh yei hok ki khynnah ka District heiwa kiwa sikai hap man ki kiwa ryntih yow bood leh kiwi ki khynnah ya ki kaam wa bha. “Nga ngait O wa kani ka App daw pynmyntoi bha ko ya ki khynnah yow lait ki u dooh yei sikai deiwa dam skur kiwa sikai khlem da yoh bor”, da ong u.
Hachwa ini, u A.K. Singh da pynyoo u lyngba ka Video Conferencing yei krehkaam kani ka App kawa daw pait yei wan skur kiwa sikai kiwa su tulop da ka sorkar Meghalaya.
“Kani ka App toh kawa chna da ka UBI Tech Solution wei krehkaam ko deiwa chna da ka Geo-Fencing kawa man kam u pood soodong ka skur lane i thaw wa da jied wei daw pyntip kani ka App lada em wa psiah wa mih ha kini ki thaw”, da khana u.
Da khana u leh wa kani ka App toh kawa pynemkaam leh da ka Facial Recognition System yow tipmit yei dur ki bru deiwa tikna hadooh 70% hawa wan ki cha skur hanla ym em Internet leh iwa man leh kam wa chim pyrtuid ya kiwa sikai wa wan wei daw tip leh kiwon ki wym em wan cha ka skur. “Lyngba kani ka App daw yoh leh ya ka Report yong uwi pa kawi kiwa sikai yei rukom wan skur ki ha waroh kawi ka District wei lada tlot ka skur ye wow pait lada toh i daw wym em wan tista kiwa sikai skur”, da khana chooh chooh u.
Chwa wow sdang u leh yeini, da e por 15 sngi ya kiwa sikai ka District wow thap pyrtuid ki hapoh kani ka App wei da yoolut wa kat ha ka 1 tarik u Naiynñiaw waroh kiwa sikai ka District da em pyrtuid lut ki hapoh kani ka App.
