Kiwa kitkaam ka Jaiñtia Coordination Committee for Reservation Policy (JCCRP) ynne ka sngi hadien wa kut i yakhih ha Amlarem wow dawa wow sylli ya ka Reservation Policy, da yaklam ki wa kiwa pathai khubor wow phah wyrta cha ka sorkar heiyatoh wa i dawa yong ki.
Neiliang u Jersom Shylla uwa man u President ka JSU da e khublei u ya waroh kiwa da e kyrchaan ya ka Committee nadooh wa sdang i yakhih na Jowai, ha Khliehriat wei da pynkut ynne ha Amlarem.
Da ong u wa ka Committee kyrchaan ko ya u Ardent Basaiawmoit uwa da sdang yakhih chah thngan ha Shillong heiwa ki Jaiñtia leh u yoh myntoi ki, deiwa pynrap wa i yakhih ym kut i du heini tangwa i wow lai chaphrang.
U President ka EJNC, u Sambormi Lyngdoh da e khublei u ya ka sorkar wa da mynjur ko wow sylli biang ya ka Reservation Policy wei da thung ko leh ya ka Expert Committee, deiwa ong leh wa kani ka Committe ymtoh u man ko kam kiwi ki Committee wa chadien wow pyn jai-jai ya ki paidbah khlem poi cheiwon cheiwon leh.
Da ong u leh wa ka sorkar u pyntikna ko wa kani ka Committe u kreh smat ko wa ymtoh u slem i sylli yong ka neibhah katni khamtam ka sorkar da pynsangeh ko ya i thung kreh hapoh jylla.
U President ka JSU, u Treiborlang Suchen da ong u wa heiyatoh wa ka yalang u Montri Rangbah ka jylla, u Conrad Sangma wa ki seiñbhalang na Ri-loom Garo, neiliang ki paidbah hi ka Ri-loom Khasi wa Jaiñtia i dawa toh wow sylli (Review) noh ya ka Reservation Policy.
Da ong u leh wa kam ki khon ka Bri u Ynñiawtrep na Khasi Jaiñtia kwah ki toh wow pynkylla ya ka Reservation Policy, tangwa hawa pait cha Ri-loom Garo won ong ki wow sylli ya ka Roster System man iwa phylla.
Heijooh i por da e khubor u cha ka sorkar wa ha kani ka yalang wa toh u yaklam du heiyatoh wa ka Reservation Policy donhi.
