Ka Nehru Yuva Kendra Sangathan, Jowai wa em hapoh ka Ministry of Youth Affairs and Sports ka sorkar India ynnin da pynman ko ya ka District Level Yuva Utsav-India @2047 kawa chi sngi ha Government Boys Higher Secondary School, Jowai.
Ka phang kani ka Yuva Utsav toh kawa ong “PANCH PRAN” yow pynroi ya ka ri India deiwa pyndooh pyndam noh yei rukom pyrkhat heipor wa chah synchaar ha ki pharæng, yow sñiaw sarong ya yong idæ wei wow pynyatylli yow man leh kam kiwa chong chnong kiwa em i kitkhlieh.
Ha kani ka sngi, u MDC ka Jowai Central, u A. Andrew Shullai da man u kam u kongsan katwa u Additional Deputy Commissioner, Jowai, u M.A. Challam da man u kam u symbood kongsan.
U Andrew Shullai hawa e yei klam da kitbok kitrwiang u ya waroh kiwa da chimbynta kamjooh kiwa pynman ya kani ka yalang khamtam ya ka NYK Jowai kiwa da chimkhia wow e ya kani ka rynsan ya ki khynroo khyllood ka District yow pynyoo yei sap yong ki. Da pynchlur u leh ya ki khynroo wow chim kabu yeini deiwa chongchit wei dei mynsien wow jop ym du ha kani ka sngi tangwa ha ki por wa chakhmat.
Chwa ini, neiliang u D. Rapsang, Deputy Director, NYKS Shillong hawa e ya ki kyntien pdiang sñiawbha da khana u wa ka thong yong kani ka sngi toh yow e laad ya ki khynroo khyllood wow pynyoo yei sap yong ki na ki skur waphær waphær ka District kam ha ki yakob Young Artist-Painting, Young Writers-Poetry, Mobile Photography, Declamation Contest wa Cultural Festival. Da khana u leh wa kiwa jop ha ka kyrdan District Level daw chimbynta ki ha ka kyrdan State Level kawa daw pynman ha Shillong wei kiwa jop na kani won daw lai chimbynta ki ha ka National Level.
Da yoh leh yei klam na u State Director NYKS Meghlaya, u Atul J. Nikam wa na kiwi de.
Waroh kiwa da chimbynta da em ki 211 ngut ki chynrang wa kynthai na ki le tylli ki C&RD Block ka District.
Ha ka bynta wa pynkut, da wan u Brightstar Chyrmang, MDC Jowai North kam u kongsan wa u H.H. Mohrmen kam u symbood kongsan.
Kiwa jop ha ka Declamation Contest toh ka Paiya Venessa Lyngdoh kawa da yoh nyngkong, hei wa ar ka Bymonmisalda Lato katwa hei wa le da yoh ka Riiung Langbang. Ha ka Mobile Photography da yoh nyngkong u Ri-O Sari, hei wa ar u Mekerda Bareh wei hei wa le u Marbudki Phawa.
Ha ka yakob chaad tynre (Cultural Event) da yoh nyngkong ki Manchwa Kam Family, hei wa ar da yoh ka Catherine Sna wei hei wa le da yoh ka Sengkur Suting Welfare Organisation.
Ha ka Young Writer Contest-Poetry da yoh nyngkong ka Rewa Phawa, u Jied Dkhar hei wa ar wa u Teilang Phawa hei wa le.
