Ynne i step, ka yung krehkaam u District Sports Officer, West Jaiñtia Hills chirup waka West Jaiñtia District Sport Association da li yang pdiang burom ki ya ki khynroo khyllood ka West Jaiñtia Hills District kiwa da rahnaam rah burom yaka District haka lympung yalehke wa tip kam ka Chief Minister’s State Level Inter-School Athletic Meet 2023 kawa da pynman ha SAI, STC Shillong, NEHU Campus wei kawa da pynkut ynnin ka sngi.
Ya kini ki khynroo khyllood da li yang pdiang burom ya ki ha chwa u psiah cha chnong Jowai wei hadien wa hiar ki ha kani ka thaw da ya chaad ya kmen wei lai won ki dei kjat chadooh madan Kiang Nangbah Stadium deilang i kmen i kyr’iaw wei rahlang ya ki Cup wa da yoh khur ki.
Manda poi ha madan Kiang Nangbah won haka yalang tbian wa pynlai u Vice President ka WJDSA, u Patrick Lamare, da yoh i klam sñiawngooh wei klam e mynsien na u Lammat O Laloo, General Secretary ka WJDSA, u S.K. Lato dkhot ka WJDSA, u EMH Passah, Working President WJDSA wa na u Assistant Director ka chnat Sport yong ka sorkar jylla uwa man leh u District Sports Officer ka West Jaiñtia Hills District, u Khroobok Passah.
Kini ki waheh hawa klam da yaroh wei e mynsien ki ya kini ki khynroo khyllood wow nang lehbha chooh chooh ki sam chaphrang neibhah ini da man i burom wym du yaka West Jaiñtia Hills tangwa wot ya kiwa ha-yung ha-sem wa ka thaw wa chong wa sah ki.
Kam u pynkynmoo ka West Jaiñtia Hills District da yoh ko yei naam Over All Champion ha kani ka lympung deiwa yoh khur ko 14 tylli ki takma Ksiar, 6 tylli ki takma Rupa wa 3 tylli ki takma Tama yow man 23 tylli waroh.
