Hadien wa da pynmih ya ki Result yong ki Exam waphær waphær ha Meghalaya, ka KSU Bengaluru Unit da pyntip ko cha waroh ki paaid Khasi wow yoh yutip wa rap bniah hajrong ki kyrdan puræ wa ya kiwa mih lai thooh kreh na ka thaaiñ mihsngi ha Bengaluru.
Iwa nyngkong da ong wa kiwa kwah wow puræ cha Karnataka khamtam ha Bengaluru da em ki da ki spah ngut wa da thap Admission ha ki thaw puræ waphær waphær lyngba ki Agent kiwa kam toh kiwa mihkhmat ya ki thaw puræ tangwa kini toh u man ki kiwa da tipmit na ki bor sorkar.
Boonsien hi, neidaw wa chida wei chaniah hok ki khynnah wa ki bei ki pa yong ki, maad ki yei eh wa khroo kiwa har rukom heiwa teiñ teiñ ki thaw puræ ymtoh kiwa da tipmit da ki Council wa ka sorkar, ki wym biang i thaw sah, wei i wym biang i rukom e sikai, i chah chim kabu ha ki bai lai puræ (Fees) wa kiwi kiwi. Kini waroh booh ko hei maa ya ka mynried ki khynnah.
Iwa ar won hajrong kitu kiwa wan thooh kreh cha Karnataka ha ki kyrdan waphær waphær. Heini leh ka KSU Bengaluru Unit da yoh ujor ko man-i-por hajrong i eh wa chem ki ha ki thaw kreh ki wym sñiawthooh ya katæ ka ‘Bond’ wa ka ‘Agreement’ hapyrdi ka Company wa kreh ki.
Kamtæ ka KSU Bengaluru Unit da kyntu ko ya waroh wa chwa wow ngait ya kiwon kiwon ki Agent wa kular thaw puræ wa i kreh ha Karnataka toh u tih bniah chwa chaphang ka thaw puræ wa i thaw kreh.
Da kyntu leh wa lada ym yoh yutip wa tikna ye ki wow kylli næ thooh yutip na ki dkhot yong ka KSU Bengaluru Unit lyngba ki dkhot ka KSU kiwa em ha ka jylla.
