Ka seiñ wa tip kam ka Keep Our Surrounding Clean Youth SHG da leh lehkmen ko ya ka World Environment Day 2023 ynne deiwa ya krehlang waka NEIPS (North East Institute of Professional Studies), ka Jowai Municipal Board (JMB), ka TNC (Team Nature Care) SHG, ka Wailadmi SHG waka Yaityllilang SHG.
Ha kani ka sngi da pynkhooid ya ki soodong ka kchaaid Tyrchi ter-ter hadooh wa poi cha ka yingkieñ Myntdu deiwa jied ya ki Plastic wa ki jakhklia wa em cha rood, cha chariñ kamjooh ha ka um ka wah.
Hachwa wow sdang i pynkhooid da em ka yalang wa pynlai da u Raj Passah uwa mihkhmat ya ka NEIPS uwa da e leh ya ki kyntien pdiang sñiawbha wei da bood i klam na u President ka KOSCY SHG, u Wenrickson Wahlang uwa da klam chaphang ka World Environment Day.
Da yoh leh i klam na u Pyndaplang Muksor uwa da khana yei kordor ka bei rym-aw yow ye i wow yoh yei im, kamtæ i leh kam ki bru toh u leh i yei bynta wow yada ya ka.
Neiliang won u waheh chnong ka Wahjiajer, u K. Rymbai da klam u yei wa emkaam ka juk wa katni wow sumaar wei wow syndong ya ka bei rym-aw neibynta ka juk wow wan.
Da pynkut ya ka yalang da ki kyntien khublei na u President ka TNC SHG, u Nishwa Pyrtuh.
