Deilang wa ka pyrthai waroh kawi, ki bor District ka West Jaiñtia Hills leh ynne da leh warom ki ya ka World Environment Day (WED) hajrong ka phang “Beat Plastic Pollution” ha ka yalang wa da pynman ha Samanlang Pastoral Center, Lumbihsyntu, Mihmyntdu.
Kam chibynta leh wow pynduna yei ktah ya ka rym-aw, ki sahep sorkar kiwa chimbynta da lai ki cha kani ka yalang da kawi ka Bus wa da pynbait da ka yung krehkaam u DC, Jowai.
Ya kani ka yalang da wan wow chimbynta da u Deputy Commissioner, u B.S. Sohliya kam u kongsan deiwa emlang ki ADC wa kynthup ya u F.B. Basan, MCS wa MA Challam, MCS deilang wa ki Assistant Commissioner, u S. Phanbuh MCS uwa da pynlai ya ka yalang wa u WK Kharbuli.
Neiliang u DC da ong u wa i kam ki bru toh kiwa em hakhlieh dooh na waroh kiwa im ha pyrthai tangwa iwa ye ki wow heh u san chong ko ha kiwa em na tre dooh, kamtæ emkaam wow sumaar ya kini. Da klam u leh hajrong kiwa boon wa ktah wa pynemkaam u bru kam ki muna Plastic wei da toh u rah da ki muna jun hawa lai yaaw lai haat. Da kyntu u leh ya kiwa chong chnong wow man ki kiwa kitkhlieh yow pynman ya ka soodong sookun kawa ye waroh i u im deiwa chait wa khiah.
Neiliang u F.B. Basan da yaroh u ya ki kaam wa da leh da ki bor District hapoh i yahkhmat Deputy Commissioner yow pynduna yei pynemkaam Plastic kam ki Flex, ki klong um Plastic wei khlem da pynemkaam Banner yow man kam ka nongmuna ya kani ka sngi kyrpang ka bei rym-aw.
Da klam u leh chaphang ka LIFE Mission wa da wanrah da u Prime Minister ka ri, u Narendra Modi ha ka Climate Change Summit 2021 ha Glasgow yow pynduna yei kylla i long i man ka suiñ bneiñ yow ye ki juk wa daw wan u im ha kani ka pyrthai yong i.
Da khana u leh ya kiwa boon wa da leh kam i pynkhooid chnong, ki yakob yah Cycle wa kiwi kiwi da kiwa boon ki chnat sorkar kam chibynta ka LIFE Mission.
Ha kani ka sngi da yoh leh yei pynyoo dur pynyoo dar da ka chnat khloo hajrong ka aiñ Wildlife Protection Act heiyatoh wa ki Syngkni (Himalayan Griffon Vulture) kiwa da wanpoi ha West Jaintia ini wa dep.
Heiyatoh wa i pynlang jhep da yoh yei klam na u Dr. HH Mohrmen wei da yoh leh yei klam wa tbian na ka Pynbeit Passah, NIC yei kaamram yong kiwa chong chnong neibynta ka bei rym-aw.
Hadien ini da saam leh ya ki Certificate cha ki chnat sorkar wa kamjooh cha ki dong wa ki chnong kiwa da chimbynta wow leh ya kiwa boon ki kaam kam chibynta kani ka World Environment Day hapoh ka District.
Da ya embynta lang ha kani ka sngi wa ki khlieh ki chnat sorkar, ki waheh chnong ka Jowai, ki khynnah skur, khynnah College kiwa da e yei rwai wa ki yalehke.
