Ka sorkar jylla da rai ko wow lai noh chakhmat yow pynpsiah kreh hadien wa da dep wow pynkylla (Amend) ya ka Office Memorandum yong u snem 2022 hajrong ka Reservation Roster.
Hawa klam hadien ka yalang ki Montri sorkar, u Montri Rangbah, u Conrad Kongal Sangma da ong u wa i pynkylla ya ka Office Memorandum man ko katkam i e yumut wa da chim na ka yalang yong waroh ki seiñ saiñpyrthai kawa da yachem hapoh ka Committee yong ka Reservation Roster wa Reservation Policy.
Da khana u wa ini i pynbna namo ka Notification daw pynmih boi mynstep ka sngi wei hadien wa da pynmih yei pynbna, i thap kreh leh daw lai biang i chakhmat ha ki chnat sorkar.
Hawa kylli hajrong i dawa yong ka VPP wow pynsangeh chwa yei pynpsiah kaam ha ki chnat sorkar kat wym pu ye u pynbait thymme ya ka Reservation Policy, neiliang u Montri Rangbah da ong u wa ym ye wow pynsangeh yei thung kreh neibhah kiwa boon ki khynroo wa yaleh kreh daw palat rta noh ki, na ini i daw hap sdang biang yei pynpsiah kaam.
