Hadien wa pynbna ka sorkar ha kini ki kajiak sngi wa ki masi, ki sñiang hapoh ka jylla da yoh kjut ki, wei ya ka dakha won da khnang syndon u wanrah na baar ka jylla neibhah wa da chem wa em dawai Formalin iwa booh hei maa yei chait i khiah ki bru wa baam ya kini ki dakha, kamtæ hawa yoh u lai sakhi ya ki thaw dai doh ha Jowai wei da yoh leh u yaklam wa kiwa dai doh heiyatoh waka yaaw ka haat yong ki neibhah wa em leh ki paidbah wa da artatien u baam doh ha kam kini ki por.
Kamtæ da chem wa ki thaw dai dakha ha Yaaw Chyiap, Yaaw CNI wa Iawmusiang, Jowai da lyngam ki kiaw kiaw lait noh du wi ar wa dai da ki dakha wa psan ha ki nan hapoh ka jylla hi. Hawa kylli won yaka yaaw ong ki wa duna bha ki bru wa thied yoosar wa rap sy’at dor kini ki jait dakha.
Neiliang kiwa dai dohsniang, dohmasi won khana ki wa ka yaaw dang biang hi hadooh kamwa man katni hanla hiar kajiak leh. Wei i hiar ka yaaw wymtoh du neidaw wa mih ki khubor yoh kjut ki masi ki sñiang tangwa jooh jia hi kamni man-u-snem ha kam ini i por, wei da pyntikna haroh ki wa kiwa ah ki da ki sñiang ki masi wa da heh pura wa kiwa chait wa khiah.
Kawi ka kong wa dai doh masi ong ko wa ha kam ini i por wa ki paidbah khuslai wei artatien ki, emkaam ya ki Doctor u lai pait lai sylli ki yaki doh wa dai ki ha yaaw wa man chngaaiñ hi ki mo.
Katwa ka wi kawa dai doh syiar ha yaaw CNI khana ko wa haka hi samen chem ko wa rap ye dai bha ko hadien i khang wow wanrah dakha tangwa i daw wa duna won ki syiar weiwa ku dor toh wa em ki jylla wa yakhih khang chnong khang sarok.
Hawa pynsñiaw won i yoo wyrai yaki paralok wa da dooh dai dakha neibhah ki toh kiwa im-ja deiwa kamai kam ka hi, booh ko i kyntu yaka sorkar wow chimkhia rap smat neibynta yong ki khnang yow yoh kamai biang ki kamwa jooh.
