Ki bor District deilang wa ka Jowai Municipal Board la chi tayaaw tam kattu da ye ki wow kyrriah ya kiwa chongai ha rood sarok ha Iawmusiang, Jowai khamtam nadooh nakhmat ka yung krehkaam u DC Jowai hadooh wa poi cha ka Yaaw Chyiap.
Ini da pynsuk bha ko yei lai i wan khamtam ki khynnah skur kiwa da yoh biang yei hok wow pynemkaam ya ki luti lai kjat kiwa da chim da kiwa chongdai na waroh arliang u sarok wei najrong wa kyllooid da wanrah kylla leh yei khooid ki rood ki kiar.
Chwa wow leh yeini, neiliang ka CEO ka Jowai Municipal Board da dep pyntip ko cha kiwa pynlai yaaw, cha ka synjuk ki waheh chnong, ka seiñ beh yaaw wa kiwi yow pynsñiawthooh yei emkaam wow kyrriah neibhah da man ko iwa da pynthut yei lai bait lai ryntih ki kari kamjooh ki bru wa lai wa wan.
Da maham wa ya kitu kiwa chongdai ki wym kyrriah wa daw kem syndon ya ki mar ki mata ki wei wow pynchitom ya ki katkam ka aiñ.
Kam wow pynkynmoo wa ini i kyrriah ya kiwa chongdai ha rood sarok da leh na ki por cha ki por da ki bor District kamjooh da ki bor ka chnong tangwa i wym jooh neh slem i ye wow pynkohngooh ya kiwa chongdai.
