Najrong i dooh bordiñ, i wym biang i rukom pynlai ya ka chnat pynmih bordiñ ka jylla, ka Meghalaya Energy Corporation Limited (MeECL), da sah ko sa ka bai bordiñ namo ka Bill hadooh kamwa T. 300 klur hadooh katni ka wym pu em su ki paidbah, ki karkhana wa ki chnat sorkar.
Hawa klam wa kiwa thoh khubor ynne ka sngi, u Chairman-cum-Managing Director ka MeECL, u Sanjay Goyal da ong u hawa kheiñ yonglang i wym su ya ka bai pynemkaam bordiñ dapoi ko cha T. 300 klur wei katni ka MeECL da pyrchang ko wow pynthymme yei rukom krehkaam wot hadooh wow ah ya ka bordiñ yong ki wym su nadooh ki yong ki bru samen, ki karkhana wa ki chnat sorkar.
Da khana u leh wa da phah dei thoh cha ki Company wa pynyieñ Mobile Tower wow su ki ya ka bai bordiñ u Tower kawa dapoi da ki lak tangka wei lada ym su, ka MeECL daw ah ko yei pynpoi bordiñ.
Heijooh i por u Goyal da khana u wa i ku ka um ha nan Umiam dang man hi ko du 6 phut deiwa slap ha kini ki sngi wei ini ympu biang wow yoh bordiñ deiwa boon wei dang emkaam chiboon u slap, wei ini toh i duna um man iwa joor tam ha kini ki phaw snem wa da dep.
Da khana u leh wa lada yoh rap boon u slap, daw ye u pynduna yei dooh bordiñ dei sngi lait noh hei por miet. Da ong u leh wa ka yingkieñ ha Umiam Dam leh daw pyndait thymme wei ka sorkar da chimkhia ko ya ini lyngba ka Scheme ka sorkar India kawa e Scheme wow pynthymme ya ki Dam yow pynmih bordiñ wei ya ini i kaam dang puræ bniah ki stat na ka IIT Guwahati.
Kamtæ da ong u wa neidaw ini i duna bordiñ, ka sorkar da pynbait ko wow thied bordiñ na ka NTPC, na yaaw madan yow pynduna yei pyndooh bordiñ.
Da kyrmen u wa ki thaw (Unit) pynmih bordiñ na ka Leshka Project leh daw ye wow pynkrehkaam noh yow pynmih bordiñ ha kini ki sngi najrong ka Ganol Project.
