Yow pynpsiah hei thij i pyrkhat ki paidbah yei kordor i chait i khiah khamtam yow pyndooh jait ya u khñiang kjut HIV uwa da poor smat haka jylla Meghalaya, ynne ka sngi ka Meghalaya AIDS Control Society chirup i yakrehlang wa ki bor District ka East Jaiñtia Hills, ka yung krehkaam yong u Medical & Health Officer wa kiwi won ki chnat krehkaam da pteiñ ki yei e sumaar mynkna ya ki paidbah ka chnong Ladrymbai heiyatoh wa ki jait kjut waphær waphær, kamjooh leh yow thooh ya ki bru wa im wa u khñiang kjut HIV khnang yow yoh ki ya ki laad sumar wa paka.
Haka yalang wa da pynman ha Community Hall ka Ladrymbai Dongwah, ka Santa Marry Shylla, MLA ka Sutnga Saipung Constituency da kyntu ko ya ki paidbah wym toh u sarom phah Test ki ya idæ neibhah emkaam bha u tip ya jar i chait i khiah wei lada em kam uni u jait khñiang leh yow yoh ki ka laad sumaar heipor wa biang neibynta i chngaaiñ ka yung ka sem waka imlang sahlang.
Heijooh i por kam kawa mihkhmat kular haroh ko u yaklam wa u Montri Rangbah ka sorkar jylla neibynta u yoh kawi ka thaw sumaar wa yatoh wa kani ka jait kjut hapoh East Jaiñtia Hills neibhah toh kawa kongsan tam.
Da emlang leh ha kani ka sngi u Deputy Commissioner, East Jaiñtia Hills District, u Abilash Baranwal, u J. Shylla, MCS, Addl. Deputy Commissioner, u R. Brahma, EAC, East Jaiñtia Hills District, ka Dr. J.N. Shullai, Director Mihmyntdu Community Social Welfare Association (MCSWA), u A.M. Lanong, Deputy Director Meghalaya AIDS Control Society, u H. Nongtdu, President Synjuk Waheh Chnong East Jaiñtia wa kiwi.
Ha ka kynta e sumaar mynkna ya ki paidbah namo ka Integrated Health Campaign, u Deputy Commissioner da yahkhmat u wow phah Test HIV ha kani hi ka thaw wei da bood sa kiwi won ki sahep sorkar, ki bru wa rap mihkhmat haka imlang sahlang wa ki paidbah.
Hawa yaklam wa ki kattu katni ngut kiwa da phah Test HIV ha kani ka sngi wa kynthup leh ya u DC, da ong ki i daw wa pynman ya ki u chimkhia phah Test toh wa em ki i bahkhlieh ya idæ kamjooh yaka yung ka sem waka imlang sahlang.
Kyntu haroh ki ya kiwi won ki paidbah wow mih ki chakhmat u phah Test khnang yow tip la em namo ymem ya uni u khñiang wei la toh wa em leh u sñiawbha ki u sumaar wei dih dawai tikna.
