Ka Khasi Jaiñtia Fish Whole Seller and Retailer Association da kylli ki na ka sorkar wa ileh kamni da chem yei Formalin ha ki dakha chisien san snem. Ini iwa da kylli ka Association toh hadien wa ka sorkar jylla lyngba ka Commissioner Food and Safety da pynmih hukum ko wow khang pynpoi ya ki dakha na baar jylla hadooh 15 sngi, kawa da sdang nadooh ka 8 tarik uni u bnai.
Hawa klam wa kiwa thoh khubor, u President ka Association, u Mitchel Wankhar da pynsñiaw u yei sñiawkhia wa da khang wow wanrah ya ki dakha na Andhra Pradesh, hanla kitai ki dakha toh kiwa da dep wow pait bniah hachwa wow pynpoi cha kani ka jylla.
Ka Association da kdaw ko wa ha u snem 2018 da jia ini i jooh heiwa da chem yei dawai Formalin wei hadien san snem da jia biang i jooh, kamtæ da ong wa ini toh iwa da jia chisien san snem, deiwa kdaw leh yeiwa da chem ka sorkar wa hadooh 40 tylli ki nongmuna wa da chim yow pait bniah, wei da kylli ki leh wa lada ya kini nongmuna wa da chim na ki dakha wa wan pynpoi bait na Andhra Pradesh næ kiwa poi na kiwi ki jylla leh.
U President ka seiñ da ong u leh wa ka Association kwah ko wow che wa lada ka chnat Fisheries kamjooh ka Health daw phah ki ya ki bru wow takit yow thooh bniah na Andhra Pradesh. Da ong chooh chooh wa lada ka sorkar kwah ko wow leh yei pait bniah lane kiwon kiwon ki Test toh wow leh ha Khlieh Ïewduh kawa man ka thaw pynhaap ya ki dakha.
Da ong u leh wa i pynbaad wa chem Formalin na ki dakha kiwa wan na Andhra Pradesh toh ka wym ye u pdiang neibhah da chimpor hadooh 2 kynta du wow pynhaap ya ki dakha, wei khamtam ka dakha kawa ki kam kiwa khayi ki dai ki ha yaaw toh ka dakha wa ki leh baam lang ki.
Neiliang u Mitchel Wankhar da ong u leh wa ka seiñ daw yachem ko wa u Montri wa toh u pait yeini wei kamjooh ya u Montri Rangbah ka jylla hajrong ini i kaam.
U Mitchel uwa man leh u Executive Member wa pait ya ki kaam dahkha ha KHADC, da khana u wa i pynpoi dakha na Andhra Pradesh ha ka chi sngi man ko hadooh 30 Metric Ton, ya kawa ka jylla ym ye ko wow pynmih na ka hi hadooh katni. Chooh chooh da khana u wa ki dakha kiwa pynpoi na Andhra Pradesh da em ki du 4 jait.
Da ong u leh wa i kaam khayi wei dai dakha hapoh ka jylla toh kawa da leh du da ki Khasi wei lada kheiñ yonglang, da em kamwa 15,000-20,000 ngut ki Khasi kiwa da chah ktah ka pliang ja na ini i khang pynpoi ya ki dakha na baar jylla.
Ka Milda Rynjah kawa man ka Vice President yong ka Association, da pynsñiaw ko yei eh wa kam kiwa khayi da maad ki deiwa pynbna syndet ka sorkar wow khang dai ya ki dakha kiwa wan poi na baar ka jylla. Da khana leh yei dooh nong wa da poi chadooh da ki klur tangka wei da ong ko leh kiyi wow kit yeini i dooh nong.
