U Pijush Hazarika, u Montri ka sorkar Assam da kyntait u wa ki bru wa sdang yei kajia ha khappood ka Assam-Meghalaya ha thaaiñ Khanduli wa ki toh kiwa na Assam.
Hawa yaklam wa kiwa thoh khubor ynne ka sngi da ong u wa kini ki damok ymtoh kiwa na Asaam.
U Montri ka Assam toh uwa da chimbyntalang hei yachem ki Regional Committee pynbait pood ynne ka sngi heiwa da chongknor lang u ya kani ka yalang deilang wa u Montri ka sorkar Meghalaya, u Sniawbhalang Dhar
U Hazarika toh uwa da khlieh ya ka Regional Committee ka West Karbi Anglong District katwa u Sniawbhalang Dhar won ya ka Regional Committee ka West Jaiñtia Hills District yow pynbait yei kajia pood ha ka Block I wa Psiar-Khanduli.
Ya ini da ong u hadien wa ini wa dep da mih i kulmar hapyrdi ki Karbi wa ki Pnar ha Khanduli, West Jaiñtia Hills District.
Da ong u wa em ka yatoh lok hapyrdi ki jaitbru ki ar jylla wa i burom kylliang ym du ya kiwa chong chnong ka Meghalaya tangwa wa waroh kiwi ki jylla ka thaaiñ North East.
Da ban joor u leh yei emkaam wow pynbait noh ya u pood hapyrdi ka Meghalaya wa Assam, deiwa pynrap wa daw ye u pynbait deiwa ye u pynhun ya waroh arliang khlem da pynslem de.
Hawa kylli chooh chooh da ong u wa ki damok toh ki damok wei kammon u tip phi kiwon kiwa leh yeini deiwa chong heini tangwa ki bru ka Assam maya ki ya ki bru ka Meghalaya wei ngait u leh wa ki bru ka Meghalaya leh maya ki ya ki bru ka Assam.
“Sñiawsih hawa em i jia hapyrdi ki Karbi wa ki Pnar wei ymtoh leh wow jia kam ini wei toh u pynneh yei suk wa ki bru ka Meghalaya. Ki bru na waroh ar jylla toh u em ki yei sñiawthooh yow ye u em i chongsuk wei ka sorkar Assam deilang wa u Montri Rangbah leh kwah u ya ini i jooh,” da ong u Hazarika.
