Da: U Soolangki D.laloo, Loomkyrwiang
Ki chakri niam ka Raij Jowai wa kynthup yow Dolloi, Pator, Langdoh, Sangot, ki Wasan deilang ki Kñi yong ki Phra Kur Phra Kmai wa ki waheh wasian ka Raij, ynne ka sngi Muchai 15 tarik Naiynru da pyndep ki ya ka Kñia Khang næ i Kñia E Ngooh, e bhet e bhar ya ki Soo-Dwar Soo-Luti wa ya ka Tawiar Takan.
Katkam ka hukum adong niam da ong wa chisien chisnem chwa wow poi ki sngi ka tayaaw yong ka Chaad Ñiam Behdieñkhlam, ka chnong ka Raij hap ko u pyndep yei bhet i bhar yong ki Soodwar Sooluti wa ka Tawiar Takan kiwa man ki Blai Chnong Blai Raij wa yieñ yada ya kær ya ka chnong ka thaw na kiwa boon ki sih ki roi yong ka pyrthai mynder.
Ya kani ka kñia e ngooh e dem, e bhet e bhar da pyndep ha man i phang i thaw wa em u Mookhai, Mooralong, Moosniang, Mootong katwa ya ka Syiem Myntdu kawa man ka Tawiar Takan da pyndep chisnem kylliang hapyrdi u Mooralong wow Moosniang.
Ha uni u snem wot hapyrdi i em u slap wa joor i lehniam haman ki phang yong ki Soo-Dwar Soo-Luti man iwa lai beit lai ryntih wei deiwa ye u pyndep ya kani ka lehniam katkam ki hukum adong u Trekirot, ka chnong ka raij u nangyoh ko yei chongsuk chongsaiñ, i miat i bha wei roi i paar ha waroh ki liang.
Kiwi ki sarin ka niam kiwa da leh da pyndep chwa wow poi kani ka sngi Kñia Khang toh ka Dih Soopen ha yung Langdoh kawa da man ha ka sngi Mulong 13 tarik wa ka Kbai Mooknor ha ka sngi Musiang 14 tarik heiwa ki chakri niam ka raij chirup ki Kñi yong ki Phra Kur Phra Kmai deilang ki waheh wasian ka Raij mih ki chakhmat ka Yaaw ka Syiem wow e wyrta chula najrong ki Mooknor wa dapoi i por wow pyndep ka Raij ka chnong yei yong ka Khang ka Kah.
