U MLA ka BJP na jylla Goa, u Nilesh Cabral uwa man leh kam u Montri sorkar, ynnin ka sngi hawa e yei klam ha Shillong, da ong u wa i pynbaad wa ka BJP pyrchah ko ya ki Christan toh iwa thok suda.
U Cabral uwa man leh u Christan na jylla Gao, da ong u wa palat 70% kiwa chong chnong ha Meghalaya toh ki Christan wei kamjooh ha Goa wei oo leh man u kam u Catholic.
Da ong u wa ya ka Goa da synchaar da ka BJP hanla man ko ka jylla wa boon dooh kiwa chong chnong kiwa man Christan, wei ini da pynyoo ko wa i pynbaad ya ka BJP wa pyrchah ko ya ki Christan man sakhiat iwa bakla.
U Cabral da klam u ya ini ha ka lehkmen yow ya pynyatoh lok lyngba ka dustur wa ki tynre hapyrdi ka Goa wa Meghalaya kawa da pynman ha yung krehkaam ka BJP Meghalaya wa em ha Shillong kam chibynta ka sngi lehkmen yei yoh jylla ka Goa hapoh ka lama ka ‘Ek Bharat Shreshtha Bharat’.
Heijooh i por hawa klam hajrong ka Uniform Civil Code (UCC), u Cabral da ong u wa ki paidbah da em ki i mutdur waphær waphær ya ka UCC, tangwa kiwa boon hi ymtoh kamwa da mutdur ki. Da ong u wa ka UCC i thmu ko toh wow pynbait yei chongkha chongman wa i ya pynlait kurim yow pyntikna yei saam marbiang ya ka spah hapyrdi ka kurim wa u kurim.
Da ong u wa ka UCC toh i thmu wow pynwandur neibynta wow pynkrehkaam ya ka Personal Laws (aiñ samen) yong kiwa chong chnong kawa krehkaam ya waroh kiwa chong chnong khlem kheiñ ya kawon kawon ka jait niam, næ kawon kawon ka jaitbru tangwa yow ya ryngkat waroh.
