Kam chibynta wow pynkut ya ka Meghalaya State League 2023, da saam leh ya ki Cheque wa mar T. 2 lak cha waroh ki District Sports Association wa da tipmit da ka Meghalaya Football Association kam chibynta wow yarap ya ki wow pynman ya ki lympung yalehbol ha ki thaaiñ yong ki.
Ini man ko leh kam chibynta i thong ka MFA waka sorkar jylla kawa kyrchaan poisa pura ya ka MSL yow pynku ya ki kaam yalehbol ha waroh ki District.
Ini i kyrchaan ya kini ki seiñ da yarap ko wow pynboon leh ya ki Club wa da wan wow chimynta heiwa ha ka sien wa nyngkong wa pynman ya ka MSL ha u 2017-18 da em 19 tylli ki Club wa da chimbynta katwa ha uni u snem da ku cha 25 tylli.
Waroh ki Club kiwa da yoh u psiah hapoh ka MSL da yoh ki leh mar T. 1 lak, kiwa yoh u psiah Semi Final da yoh ki sa mar T. 1 lak.
Kawa rem won ha ka Final da yoh ki sa T. 3 lak katwa kawa jop Final won da yoh ki T. 5 lak.
Palat 80% ka poisa wa da yoh yow pynman ya ka MSL da pynlai won ka cha ki Club.
