Ka Khasi Hills Autonomous District Council da pynsñiaw ko yei sñiawkhia hajrong i wan buhai chnong yong ki jaitbru na Manipur, wei da pynsñiaw ki yei maa wa yang lada ym ye wow kdoh u khoom lane wow paitbniah.
Ya kani ka phang yatai da wanrah da u MDC wa dei thung, u Bindo M Lanong uwa da ong wa i yoo wyrai toh u em da u pood, wei pynsñiaw u leh yei sñiawkhia ya iyi wa jia ha Manipur, wei da pynrap u deiwa ong wa ki bru na Manipur kiwa wan ban buhai chnong toh u liwan ki hadien wa da suk biang i long i man ha katai ka jylla.
Hawa chimbynta ha kani ka yatai, neiliang uwa yahkhmat ka Liang Pyrchah, u Titosstarwell Chyne da pynkynmoo wa u da dep khut u ya ki waheh chnong yow paitbniah ya kiwa poi wiar na Manipur.
U Titos, uwa man leh kam u CEM warim da kyntu u ya ka EC wa thymme wow booddien hajrong ini i kaam neibhah man-ka-sngi i buhai chnong da pteiñ da kini ki jaitbru, ym du ha sor tangwa ha ki thaw khappood waka Assam kam ha Maikhuli, Pillangkata wa kiwi ki thaw ha Ri-Bhoi.
Da ong u wa ka sorkar lada em ko i sñiaw heiyatoh wa ini, toh u chna ko ya ki yung wa chipor yow man kam ka Refugee Camp neibynta kiwa yut chnong wei thoh u phah liwan ki cha ka jylla manda i long i man da biang i.
Neiliang u Deputy CEM ka KHADC, u Pynshngaiñ N Syiem da kular u hapoh ka yung dorbar wow booddien wei wow paitbniah ya kani ka kaam wei wow pyntikna leh wa kitai kiwa poi wiar ym yoh ki wow thied thaw ha ki thaw yong ka KHADC, khamtam ha ki thaaiñ Pillangkata kawa em ha khappood wa ka Assam.
