Ka International Day against Drug Abuse and Illicit Trafficking kawa tip leh kam ka Nasha Mukt Bharat Abhiyaan da kynmoo warom ya ka ynne ka sngi ha Thomas Jones Synod College, Jowai ha ka yalang wa pynman da ka Breakthrough De-Addiction and Rehabilitation Centre, KJP Synod Mihngi, deiwa kyrchaan poisa ka District Social Welfare Officer Jowai wa ha kawi won ka yalang wa da pynman ha Chutwakhu Indoor Auditorium, da ka yung krehkaam u Superintendent of Police, West Jaiñtia Hills hajrong ka phang wa ong “People First: Stop Stigma and Discrimination, Strengthen Prevention.”
Kini ki pynsñiawthooh paidbah toh hajrong i maa hawa pynemkaam drugs kamjooh yow pyrchah yei khayi drugs deiwa pynchlur ya ki paidbah wow yieñ ki wow yaleh pyrchah.
Neiliang kiwa klam da kyntu ki ya ki khon khynroo khyllood wow yait ki na kiwon kiwon ki drugs.
U B. Kharmalki, General Secretary ka Meghalaya Users Forum da khana u kammon da jop u yei dih drugs katwa u Hame Shaniah Suiam, International Kickboxer kamjooh u National Gold Medallist da e u yei klam e mynsien hajrong ka phang wa ong “Win Without Drugs.”
Neiliang won ka District Social Welfare Officer, ka J. Synnah leh da e ko yei klam hajrong kiwa boon ki kaam wa da sdang da ka Ministry of Social Justice and Empowerment yow pynman ya ka imlang sahlang kawa lait nei drugs.
Da yoh leh ya ka lehke wa tbian da ki dkhot ka Mynthong Junior Christian Endeavour Society hajrong ka phang “People First: Stop Stigma and Discrimination, Strengthen Prevention.”
Neiliang ka yung krehkaam ka District Social Welfare Officer da dep ko leh wow pynman ya ka yakob dro dur wei da saam leh ya ki khusnaam cha kiwa jop. Ha kani ka yalang da chim leh ya ka smai wow pynman ya ka ri kawa lait nei drugs wa yahkhmat u puræ da ka DSWO.
Da yoh leh yei klam na u Rev P.L. Pakma, Executive Secretary KJP Mihngi wei da pynlai ya ka yalang da u Rev. R.K. Sutnga wei da yoh ya ki kyntien e khublei na u Shaphrang Dkhar, Co-ordinator Breakthrough Centre.
Ha ka yalang wa da pynman da ka yung krehkaam u SP won da em 7 tylli ki skur kiwa da wan wow chimbynta deiwa emlang u Superintendent of Police, u C Syrti, u Additional Superintendent of Police, u Dr. VDS Rymbai, DSP (Law & Order/ Traffic) wei da pynlai ya ka yalang da ka C W Lyngdoh, DSP.
Neiliang u SP da klam u hajrong i ktah i pynemkaam drugs deiwa ong ya ki khynnah skur wym toh u tieñ ki u kyntait yei drugs.
Ha ki sngi chwa ynne, neiliang ka yung krehkaam u Superintendent of Police da dep pynman ki ya boon tylli ki pynsñiawthooh paidbah hapoh ka District hajrong i maa i drugs.
