U Director General of Police (DGP) ka Meghalaya, u Dr. LR Bishnoi ynne da ong u wa ki chipai ka Border Security Force (BSF) kiwa da booh ha ki thaaiñ khappood emkaam ki yei ya krehlang wa i yajan bha wa kiwa chong chnong yow lait u mih i sñiawthooh bakla.
Hawa yaklam wa kiwa thoh khubor ynne da ong u wa ini emkaam wow yajan nadooh ki waheh chnong wa ki Village Defense Party yow lait u mih i awri awra du neidaw wa em i sñiawthooh bakla.
Kam wow pynkynmoo wa ynnin i miet da em san ngut ki bru paidbah wa mynsoo wa ar ngut ki BSF hadien wa chah kawang moo ki chipai BSF wa em ha Standing Patrol Base wa em Umsyiemrim, East Khasi Hills District. Ini wa da jia heipor kamwa 10:00 waje i miet iwa man i chnong wa em hajan Dawki heiwa ki BSF da siat ki cha suiñ soo kuli yow tympra ya ki paidbah kiwa da yalang kiwa da kawang moo kawang klong ya ki BSF.
U DGP da ong u wa ki pulit leh u pteiñ ki wow yaklam wa ki BSF yow lait u mih iwon iown i sñiawthooh bakla neini chakhmat.
Heijooh i por da ong u wa daw kyrpaad leh ya ki BSF wow ya krehlang ki wa ki pulit kamjooh kiwa chong chnong yow pyndooh yei sñiawthooh bakla wei yow yoh yei chaniah.
