Kam chibynta wow pyndooh jait noh yei kjut TB hapoh waroh kawi ka ri, neiliang ka yung krehkkamka District TB Office, Ri-Bhoi District hapoh i yahkhmat ka Dr. E. Kalwing da pynman ki ya ka yalang pynsñiawthooh paidbah hajrong ka kjut Tuberculosis wei da saam baam leh hapoh ka Scheme Pradhan Mantri TB Mukt Bharat Abhiyan (PMTBMBA) ha Harlibagan Community Hall, Byrnhihat ha ka 20 tarik uni u bnai.
Hapoh ka District da em 300 ngut kiwa em ya ini i kjut tangwa da em du 77 ngut kiwa yoh yarap na ki bru wow man kam ki “Nikshay Mitra”, kamtæ ka Doctor da pynchlur ko ya kiwi wow wan ki chakhmat deiwa kular wow e yarap ya kiwa yoh TB deiwa man ki leh kam ki Mitra.
Ka Dr. E.Kalwing, District TB Officer da khana ko wa yei kjut TB toh iwa mih na u khñiang Bacteria (Mycobacterium Tuberculosis) iwa da ktah yei sner ki bru wei da ktah i ya waroh ki bynta u bru lait na ki tyrsim wa u sñiooh. I TB da poor i leh lyngba ka la-ær manda ka-oh kiwa em TB, manda synrieh wei manda mynthu.
Ki dak ki chin manda yoh TB toh manda neh i ka-oh palat ar tayaaw, i kjut rupai, i tlot, i rkhoh syndet, i iñdoh wa i mih chit heipor wa thiah.
Da khana ko leh wa hapoh ka District da dep pynman ki ya kiwa boon ki kaam yow poi cha ka thong yow pyndooh jait yei kjut TB deiwa lai thooh ya kiwa em ya ini i kjut lyngba ka Active Case Finding (ACF), ki Health Camp, i lai ya syllok wa kiwa ha-yung wa ki chnong kiwa em wa yoh TB deiwa krehlang wa ki Frontline Health Worker, i lai chim nongmuna na ki bru kamjooh i pynman ya ki pynsñiawthooh paidbah dei langær ha ki chnong ki thaw, ki skur, kiwa e dawai kynbat wa kiwa yahkhmat chnong.
U P. Shylla, DRTB Co-ordinator da pyntip u wa i thong yong ka PMTBMBA toh yow pyndooh jait yei kjut TB deiwa ya krehlang kiwa chong chnong wow jied ki ya uwi uwa kjut TB deiwa e yarap da ki baam wa yarap yei doh i pran yong ki wow yaleh pyrchah yei kjut TB wei da e khublei u leh ya kiwa da wan chakhmat wow man kam ki Nikshay Mitra (Doner) namo ki bru wa e yarap sñiawbha. Chooh chooh da ong u wa da em leh kiwa kjut TB kiwa da yoh yarap na ki karkhana wa em hapoh ka District.
Chooh chooh da pyntip u wa ka thaaiñ Byrnihat toh kawa boon bha kiwa yoh TB hapoh ka District neidaw i long i man ka rym-aw wei emlaad bha wow yoh TB. Kamtæ da kyntu u ya kiwi ki karkhana wow man kam ki Nikshay Mitra yow e yarap cha kiwa yoh TB hapoh ka jylla.
Ha katai ka sngi da em 36 ngut kiwa yoh TB na Byrnihat kiwa da yoh yarap da ki mar baam wa e da u Lat ka jylla, u Phagu Chauhan, u Sosthenes Sohtun, MLA ka Jirang, ka Pioneer Carbide Pvt. Ltd, na ka Shyam Century Ferrour Alloy Pvt. Ltd wa na ka Maithan Alloy Pvt. Ltd.
Neiliang u P.S. Biswal, uwa mihkhmat ya ka Maithan Alloy Pvt. Ltd wa u Tapan Ranjay Roy, na ka Shyam Century Ferrour Alloy Pvt. Ltd kiwa da emlang ha kani ka sngi da pynsñiaw ki yei kmen wow yoh u chimbynta ha ini wa da sdang da ka sorkar pyrdi. Da yooluti u leh wow yoh u chimbynta chooh chooh ha kiwi de kam kini hanla ynne i e yarap man ko iwa khian.
Neiliang kiwa yoh yarap da e khublei ki cha waroh kiwa da e yarap neibhah daw yarap ko ya ki wow yoh u baam bha wei yow smat chait ki.
