Ka Dorbar Chnong Khanduli ynne ka sngi da e u jor ko ha u DC ka West Jaiñtia Hills District heiyatoh wa i chah pam khiar ki dieñ kiwa em hapoh u pood ka chnong da ki jaitbru Karbi.
Ka dorbar chnong da pyrchah joor ko ya ini i leh ki Karbi ya ki dieñ kiwa em hapoh khloo chnong Khanduli haka 22 tarik uni u bnai ryngkat i emlang ki pulit Assam wa ka seiñbhalang (KSA) na West Karbi Anglong.
Kani ka khloo chnong dang em ko hapoh i pait ka JHADC wei kawa da em ya ka Land Holding wa pura wei ymtip neiyi i daw wa leh ki yeini man-u-snem.
Kamtæ da kyrpaad ya ka sorkar wow chimkhia yeini khnang wow lait nei awri awra.
Hadien ini waroh neiliang ka chnong da chong dorbar ko ynnin ka 26 tarik wei da chim ko ya i rai wa hadien ini pam khiar ya ki dieñ ha khloo chnong ha i thaw wa tip kam ka Samynthoo, da rai biang wow khang ya i khayi pateiñ hapyrdi ki Karbi deilang wa kitu kiwa em ha Mookoiram wow wan ki cha Khanduli wa Siatsama heijooh i por leh wym chah de u ya lai ya wan ki Pnar cha ki thaw ki Karbi.
