Ka Montri wa pait yei chait i khiah ha ka jylla, ka Dr. M. Ampareen Lyngdoh da ong ko wa kiwa khayi wa kiwa dai dakha toh u booh wei tymmoh bha ki yow pyntikna wa dai ki da ki mar wa bha cha ki paidbah.
Da khana ko wa ha i yachem wa kiwa khayi dakha dang ini wa dep, da klam cha ki da toh u booh wei tymmoh bha ya ki mar baam yow yada nei sih, neibha wa toh i kaamram i yong ki wow e yada wa bha neibynta ki paidbah.
Da ong ko wa lada em i leh buit tooh ya ki dakha toh i kaamram yong kiwa khayi wow thooh heiwon leh thok, neibhah kam kiwa khayi toh u chim ki yei kitkhlieh wa ki marbaam wa dai ki cha ki paidbah toh u man ki kiwa chngaaiñ. Chooh chooh da ong wa em leh ki aiñ neibynta kitu kiwa tyngkheiñ ya ki kyndon yong ka Food Safety.
Neiliang ka Montri kawa man leh kawa e ktien yong ka sorkar MDA, da pynsñiaw ko yei phylla yei kam kiwa khayi wa chimpor du kamwa 4 sngi wow pynpoi ya ki dakha nadooh Karnataka, neibhah katkam i yong sakhiat wow kit da ka kari nadooh Karnataka cha Meghalaya daw chimpor ym duna ya ka 15 sngi.
Da khana ko leh wa neiliang ka sorkar da phah ko ya ka yung krehkaam ka Food Safety wow chimkhia hajrong ini wei wow pynman yei takit yow chem yeiwa sakhiat wa kammon du 4 sngi da ye wow pynpoi ya ki dakha wei kammon ki dakha dang yoo thymme wot hadien wa da booh da boon sngi.
Hadien wa da chah biang ka sorkar wow wanrah dakha nadooh ka 24 tarik hadien wa da khang ha ka 8 tarik uni u bnai, ynne ka sngi ki sahep ka chnat Food Safety da lai chim ki ya ki nongmuna yow pait bniah wei pyntikna wa ki dakha wa da dai ha ka jylla toh kiwa miat u baam.
