Ka seiñ Achik Conscious Holistically Integrated Krima (ACHIK) ynne da e por ko 7 sngi ya ka sorkar Meghalaya wow pynkrehkaam ya ka Reservation Roster deiwa kheiñ nadooh nachwa.
Ha ka kyrwoh wa da phah, u President ka ACHIK, u Thomas M Marak da ong wa ini i dawa na ka sorkar toh ha waroh ki chnat sorkar wa ki thaw puræ wei lada ym ye wow e yei jubab hapoh 7 sngi daw ktah bha ko yei chaniah ki paidbah ya kani ka sorkar.
Da ong u leh wa lada em i doh yei hok, toh i kaamram ka sorkar wow pynyoh yei hok yow man salonsar ya waroh kiwa chong chnong wei ini toh wow pynyoh yei hok kreh wa da dooh nachwa deiwa pynkrehkaam ya ka Roster System deiwa kheiñ nadooh wa sdang ini i dooh yei hok wei ini toh i hok wa toh u yoh katkam ka riti synchaar.
Chooh chooh da ong u wa lada pteiñ u dooh yei hok daw pynjoor ko leh yei noh chiliang wei kiwa chong chnong ym chong kli kti ki lada ym yoh yei hok.
Kamtæ da ong u wa i pynkrehkaam ya ka Roster toh yow pynyoh yei hok wa da dooh wei ini man ko ka yurim wa chong hok.
Da kdaw u leh wa ka Roster System toh yow pyntikna wym em ki SC, ST, ki OBC kiwa dooh yei hok yong ki wei deiwa pynkrehkaam deiwa kheiñ nadooh ki por wa nachwa daw pyndap ya iwa da dooh wei ym ngait u leh ye e daw ka sorkar wa chitom u kheiñ nadooh nachwa hadooh katwon wa da dooh yei bhah.
