Ka seiñ ki tre Truck wa tip kam ka East Jaiñtia Hills Truck Owner and Transporter Association (EJHTOTA) ynnin i janmiet ka 28 tarik da yachem ko waka seiñ ki kharkhana pynmih khyndaw bilat wa em ha East Jaiñtia Hills District neibynta u pynsñiaw yei eh wa maad ki heiyatoh wa i khih i khan yong ki.
Haka yalang wa da pynman ha kharkhana Topcem da emlang nadooh kiwa mihkhmat ki kharkhana waphær waphær hapoh ka satri yong ka All Jaintia Hills Cement Manufacturing Association (AJHCMA), neitæ kiwa mihkhmat ka EJHTOTA deilang kiwa boon ki dkhot.
Neiliang u President ka East Jaiñtia Hills Truck Owner and Transporter Association, u Kyrchan Dkhar hadien ka yalang khana u yei daw wa wan yachem ki wa ki bru yong ki karkhana pynmih khyndaw bilat toh wa kam ki tre Truck wym jooh rap yoh kamai namo u kit Load na ki karkhana wei najrong wa i dor i mur leh wym em man iwa biang.
Da pynbaad ki wa ki kharkhana pynmih khyndaw bilat da ksih beiñ ki yaki bru Pnar deiwa leh boon jait ki buit, tangwa kamwa ki ktien im sngi namo ka Moto yong ka seiñ ong ko “Safety satisfaction and on time delivery is our priority”, u Kyrchan Dkhar ong u wa kam kiwa yahkhmat u thooh ki ya ki laad ki luti u pynjem ya waroh i eh i khoo.
Wei kamwa kani toh ka sien nyngkong i yachem yong ki, khana u wa neiliang ki kharkhana ym pu ye ki u ong iyi iyi, tangwa da ong ki wow e dei thoh ya waroh i dawa yong ki.
Hawa yaklam wa u R.K. Pareek, President ka All Jaiñtia Hills Cement Manufacturing Association uwa man leh u heh ka Topcem Cement, da khana u wa hei yachem da yaklam ki yei eh wa da maad da ka seiñ ki tre trok.
Tangwa kyntu won u ya ki wow e ki dei thoh hajrong waroh i eh wa i dawa ki khnang yow phah ki cha ki khlieh Company neibhah wa ki man ki du kam kiwa mihkhmat yong ki Company wei hadien itæ daw yachem yaklam biang ki chwa u yoh yei rai.
