Ka Half Way Home for Rehabilitation of Persons Living With Mental Illness kawa em ha chnong Sabah Muswang, West Jaiñtia Hills District hajan ka Woodland WK Hospital toh ka thaw wa da seiñ kyrpang neibynta u yarap yaki bru wa chitom hei bor pyrkhat pyrdaiñ, itæ toh hadien wa da mih ki na ki thaw sumaar waphær waphær yow wan sah chwa ki chipor ha kani ka thaw khnang yow yoh ki yei sikai i pynsñiawthooh hachwa u liwan ki cha yung kamjooh cha ka imlang sahlang.
Ha kani ka thaw, kiwa chitom hei bor pyrkhat u yoh ki yei kynja pynsñiawthooh wa i e mynsien, i pynsñiawthooh wa yatoh waka imlang sahlang, najrong wa daw em leh i e sikai kam ki kynja Vocational Training khnang wa manda liwan yung yow tip kammon u pynyatoh waka imlang sahlang wei kammon u khih kreh.
Ya kani ka Half Way Home u pynlai daka Society for Urban & Rural Empowerment (SURE) hapoh i pait i yoo ka chnat Directorate of Social Welfare ka sorkar jylla.
Ya kani ka Half Way Home da wai paidbah leh ynne hi ka sngi da u Deputy Commissioner ka West Jaiñtia Hills District, u B.S. Sohliya chirup i emlang ka Director yong ka chnat Social Welfare, ka C.D.Lyngwa, ka Dr. A.N.Paswet na Jowai Civil Hosptial, ka J. Synnah, District Social Welfare WJH, ka DSP WJH, ka C.W. Lyngdoh, u waheh chnong ka Sabahmuswang, ki dkhot ka SURE wa toh u pait ya kani ka thaw wa kiwi.
Ka Director yong ka chnat Social Welfare, ka C.D. Lyngwa hawa klam da pynsñiaw ko i sñiawngooh ya waroh kiwa embynta u pynlai ya kani ka Half Way Home deiwa yooluti leh u man sakhiat ki kiwa yarap yong kiwa kjut.
Heijooh i por kyntu haroh ko wow e ki yei chakri wa bha tam hei kaam wa kreh ki najrong u ka-it leh yei kaam khnang wa iyi wa leh u man iwa jop wei pynhun ya waroh lang.
Neiliang u Deputy Commissioner won hawa klam kyntu u yaki paidbah kamjooh ki chnong ki thaw waphær waphær wow pdiang ki wei wow sñiawthooh leh ya ki bru wa chitom hei bor pyrkhat wei katwa ye leh u pyrchang pynkylla noh yei rukom pyrkhat yong ki khnang yow sñiawthooh ya kiwa chitom, neibhah boi em ki ka bynta wa khroo wa ye ki u leh palat ya kiwa biang i bor pyrkhat wei rukom im.
Heiyatoh wa kani ka Half Way Home kular haroh u wa neini chakhmat ka yung krehkaam yong oo deilang waka chnat Social Welfare, ki Doctor daw ya chong pyrkhat ki hajrong kammon u pynbha chooh chooh ka, neibhah ymtoh iwa suk wei ya boi daw jia iyi iyi wym poi pyrkhat chakhmat kamtæ emkaam u man kiwa da pynkreh chwa.
