Kam chibynta ka “The International Day Against Drug Abuse & Illicit Trafficking” neiliang ka yung krehkaam ka District Mental Health Programme hapoh ka yung krehkaam u District Medical & Health Officer, West Jaiñtia Hills District Jowai, ha ka 26 tarik uni u bnai da pynman ki yaka yalang pynsñiawthooh hajrong i ktah i drugs deilang wa i khayi drugs ha Little Flower Higher Secondary School Ummulong.
Ka phang pyrdi kani ka yalang toh kawa ong “People First: Stop Stigma and Discrimination, Strengthen Prevention” heiwa da pynlai ya ka yalang da ka E. Pohty, Monitoring & Evaluation Officer, DMHP wei da yoh ya ki kyntien pdiang sñiawbha na u Rev. Father P. Shylla uwa man leh u Principal kani ka skur.
Neiliang ki bru wa chemphang da klam ki hajrong kiwa boon jait wa ktah i drugs nadooh yei doh i pran kamjooh leh yei bor pyrkhat pyrdaiñ.
Ka Dr. A.M. Pasweth, Psychiatrist, District Nodal Officer, DMHP da khana ko ya kiwa boon ki rukom dih drugs wei kammon u tip ya ki dak ki chin manda em wa chah kdooh chah khoom, i kjut wa yoh ki, ki jait yarap wa i sumaar wa ye u yoh ki kamjooh kammon wow yada na ini waroh.
Ka S. Syngkon, Clinical Psychologist, DMHP da klam ko hajrong i ktah i drugs yei bor pyrkhat, kammon kylla i rukom man kiwa pynemkaam drugs, ki yasyllok wa ye u e ya ki wa kiwi ki yarap yow ye u lait na ini waroh yow im biang deiwa chait.
Ka D. Tongper, Psychiatric Social Worker, DMHP da klam ko yei kaamram ki khynnah skur wow pyndooh noh yei paitkhmat wei sñiawthooh bakla ya kiwa pynemkaam drugs.
