Ka Jaiñtia Students’ Union (JSU), ynne da pynman ko ya ka yalang wow pynskem ya ka chnat ka seiñ wa tip kam ka Khliehriat Circle ha Khliehriat West Community Hall heiwa u MLA warim ka thaaiñ, u Justine Dkhar da man u kam u kongsan, u Jason Mairom, DSP kam u symbood kongsan, u Dr. Phervision Nongtdu kam uwa chah khut sñiawbha hei emlang kiwa kitkaam ki seiñbhalang wa em hapoh ka District wa kiwi kiwi.
Ya ka yalang da pynlai da u President warim ka seiñ, u Rikut Pareiñ, ki kyntien lamphrang da yoh na u Ajoymanson Lyngdoh, Secretary ka Khliehriat Circle.
U Sambormi Lyngdoh uwa man u President ka EJNC hawa e yei klam da kitbok u ya kiwa kitkaam ka Circle deiwa ong u wa ka seiñ neipor cheipor jooh kreh ko waka JSU wei ha kini ki por wa dadep da kreh lang hapoh ka JCCRP neibynta ka Reservation Policy.
U Dr. Phervision Nongtdu hawa e yei klam da ong u wa emkaam katni wow pyrkhat ya ka Exam CUET neibhah ki thaw thoh ya kani ka Exam em ki du cha baar jylla wei emkaam wow dawa wow booh ya ki Centre ha waroh ki District ka jylla.
U Jason Mairom hawa e yei klam da kitbok u ya ki dkhot ka seiñ wei da kyntu u leh ya ki wow yakrehlang waka chnat pulit.
U Justine Dkhar hawa e yei klam da ong u wa emkaam bha wow em i yajan ha iwi pa iwi wei wow man kiwa yatylli hawa kreh ya iwon iwon i kaam.
Chooh chooh da ong u hawa kreh ya iwon iwon i kaam daw em bait kiwa beiñ wa kiwa kynnoh tangwa ymtoh wow ap ya kiwa beiñ wei i kaam toh u lai i chaphrang.
Da yoh leh i klam na u Livingson Sama uwa man u President ka JSU Khliehriat Circle, ki kyntien khublei na u Winchester Salahe uwa man u Vice President ka Khliehriat Circle.
Ya ki kyntien kular da yahkhnat wow chim da u Jersom Shylla uwa man u President ka JSU Central Body.
