Hadien i yahkhmat u DC ka East Jaiñtia Hills, u A. Baranwal u phah Test ya idæ yow tip lada em ya u khñiang HIV, da bood ya kani ka nongmuna wa bha ynnin ka sngi sa ki dkhot yong ka East Jaiñtia Hill District Tourist Association waka Tourist Taxi Driver Association Lad Rymbai to Kalain Badarpur dei mynsien wa sñiawkhia neidaw wa boon kiwa yoh HIV hapoh ka District, kamtæ da chim ki yei kitkhlieh wow phah Test ya idæ kam ka dak u pynchlur ya kiwi tawon ki lok ki wym pu jooh phah Test khnang yow wan ki chakhmat yow tip wei yow lait nei khuslai wei lada toh kiwa yoh ya ini u khñiang yow yoh sumaar smat neibhah katni da biang ki dawai dachin wa da e ka sorkar dei mynkna.
Ya kani ka Test leh kawa man dei mynkna da pynman ha Mookhep East Jaintia Hill District da ka Mihmyntdu Community Social Welfare Association (MCSWA) chirup i krehlang waka yung krehkaam u Deputy Commissioner ka East Jaiñtia Hills ya kawa da kyrchaan da ka Meghalaya AIDS Control Society, Shillong.
Hawa yaklam wa ki President yong kini ki ar seiñ, u A. Ryngkhlem wa u H. Rymbai da ong ki wa i daw hi wa kwah wow phah Test toh wa ki kam ka Association kwah ki pynyoo yei kitkhlieh yaka District waroh kawi kawa da ku kiwa em khñiang HIV.
Ha kani ka sngi da sneiñ da kyntu ki ya ki para wa yah kari wym hoi u ya thiah u dem kulmar chawah chaneiñ wei da kyntu ki leh wa hawa yarap ya kiwon kiwon ki paralok wa ngat hei chah tyrrah kari wow kynmoo ki u sap da ki sapkti.
Da ban joor ki leh wa ymhoi u dih kiad heipor wa yah kari, wei u kit palat pood ya kiwa chong kari wei da maham ki leh ya kiwa yah kari wym hoi u pynhær smat ya ki kari.
Ha kani ka sngi ki President yong ki ar seiñ da yahkhmat ki wow phah Test ya idæ.
Da em leh i phah Check-Up ya waroh kiwa yah kari kam ya ka Blood Pressure, ka General Check-Up, i Test ya ka Hepatitis B wa C wa kiwi kiwi ki jait kjut.
Puræ leh: Yahkhmat Test HIV u DC East Jaiñtia Hills deilang wa ki sahep sorkar
