Kam chibynta wow ya krehlang wei wow chimkhia kamjooh yow pynchlur ya kiwi wow wan ki chakhmat yow phah Test HIV, neiliang ki dkhot ka “Chi Iung” da chim ki leh ya ka bynta wow phah Test ya idæ hapoh ka thong wa ong Know Your Status-Get Tested khnang yow tip lada em ya uni u khñiang.
Ya ini da leh ki ha ka Testing Camp wa da pynman ha ka 1 tarik ha Mookhep kawa da pynman da ka Mihmyntdu Community Social Welfare Association (MCSWA) chirup i krehlang waka yung krehkaam u Deputy Commissioner ka East Jaiñtia Hills deiwa kyrchaan ka MACS.
Neidaw leh wa ka East Jaiñtia Hills da man ko kawa boon kiwa em HIV, kamtæ da ban joor ya ki paidbah wow mih ki chakhmat yow phah Test ki wei ymtoh u sarom neibhah wa man u leh kam kiwi ki kjait khñiang wei em leh i dawai wow pyntlot bor oo.
Hawa yaklam wa ki dkhot ka Chi Iung hadien wa dep Test ki, da pynsñiaw ki yei sñiawhun, i sñiaw skem neibhah wa da tip ki yei man yong ki wei ini yarap ko ym du kat ya ki hi samen samen tangwa wot ya kiwa maya saya yong ki.
Kamtæ neiliang yong ki kam ki khynroo kyntu ki yaki paralok khynroo wow ya pyrkhat arsien ki chwa u leh ki iwon iwon i kaam khamtam heiyatoh waka chongkha chongman wei da khut ki leh ya waroh u phah Test ki ya idæ heiyatoh wa u HIV.
