Ynne ka sngi ka CEC ka East Jaiñtia National Council (EJNC) hapoh i yahkhmat u Vice President ka seiñ, u Ency Shadap da lai booddien biang ko ya ka chithi kawa da pynmih da ka yung krehkaam u Deputy Commissioner ka East Jaiñtia Hills kawa khut wow pyndap yei kreh LDA ha Lumshnong C&RD Block, EJH kawa ong wa kiwa yaleh kreh emkaam u man ki kiwa da kreh chwa namo kiwa em ya ka Work Experience kawa ym duna ya ka 2 snem.
Hajrong ini ka seiñ da e dorkhat ko ha ka 30 tarik u Naiynñiaw wow dawa pyndam chisiendon ya kani ka kyndon.
Hajrong ini, ka seiñ da yachem ko wa u DC ynne ka sngi wei hadien i yaklam wa yillu, u DC da kular u wow chimkhia ya ini i kaam wei wow pyndam ya ini ka kyndon wei wow phah leh ya kiwa pait ya ini i kaam wow pyndam yeini.
Neiliang u Ency Shadap da yaroh u ya u DC wa da chimkhia u yeini i kaam khnang wa ki khynroo ka thaaiñ u em kyrmen chooh ki hawa yakhun ya kani ka kreh, wei da kyntu leh wow pynsmat wut-wut ya ini i kaam.
Kani ka chithi wa pynmih u DC toh ha ka 20-06-23 kawa em ya u Ref No. EJHD/DRDA/702/2022/5.
