Heiyatoh wa iwa da jia ynne i sngi ha chnong Lumkynsai, Smit wa em i kynja pdung wa joor bha, neiliang u SP ka East Khasi Hills da ong u wa ini da jia heipor kamwa 12:00 waje pyrdi sngi heiwa u bru wa tip kam u Pynsuklang Khongwir (38 snem) uwa thiah kjut (khlem ye de u khai) uwa man leh u khon ka Thirmai Khongwir da khlaad u ha ini wa jia.
Ki pulit da ong ki wa ini wa jia toh iwa joor bha hadooh wa da sih leh kiwi ki kamra wa em ha ka mala wa na tre kani ka yung.
Katkam iwa da chem ka takit hadooh kattæ, da khana kiwa ha-yung wa uni uwa khlaad toh uwa dang dep chah pooid u budloom u ar bnai nachwa wei da man u u wym ye de wow khai na thaw thiah.
Chooh chooh da khana ki wa da dep u leh wow pyrchang wow pynkut yei mynsien la ar sien.
Hei takit ki pulit ka Bomb Squad wa ka CSU da chem ki ya ki lyngkhit lyngkhot wa man kam i bynta yong i tiar wa da pynemkaam yow tympdung wei dang pynman takit yow pyntikna kammon da leh yeini.
