U Montri Rangbah ka jylla, u Conrad K Sangma, ynne da chimbynta u ha ka lehkmen dap chi snem nadooh wa sdang ya ka YESS Meghalaya ha ka yalang wa pynman ha Pinewood Hotel Banquet Hall, Shillong.
U Conrad hawa e yei klam da ong u wa em chiboon i yaphær heiyatoh wa iwa thrang ki khynroo wei emkaam wow thooh ki laad wow sñiawthooh yei yi iwa ka-it ki. Da ong u wa em chiboon ki seiñ kiwa pynman ya kiwa boon ki kaam khlem da kyrchaan ka sokar wei da leh ki deiwa em i mynsien yong ki wow leh hi khlem da kyrchaan ka sorkar ya ini waroh.
Da ong u wa ka sorkar daw pyrkhat yillu ko wow pynwandur khnang wow pynbiang poisa wow e cha ki seiñ wow pynman ya ki laad yarap wa har rukom.
Da ong u leh wa ka YESS Meghalaya ini wa dep toh kawa lai lyngba ka Chief Minister’s Secretariat wei kattu u e kti noh ko cha ka Sports & Youth Affairs Department.
Chooh chooh da ong u leh wa daw em ki kaam neibynta kiwa seiñ khih, kiwa tem wa put, kiwa lehke Sports, kiwa chna phlilm khnang wow ye ki u pynyoo yei sap i tap yong ki wei u man ko leh kam wow pynchlur ya ki wei wow yoh ki wow em ha ka rynsaan wa biang.
“Ka YESS Meghalaya toh ka thong ka sorkar kawa miat wei kawa da yoh yaroh, wei kyntu O ya ki khynroo wow chim kabu ya ini i yarap ka sorkar,” da ong u Conrad.
Ha kani ka sngi u Conrad da ya pynlait u leh ya ka Revised Guidelines ka YESS Meghalaya wei da saam u ya ki Cheque cha kiwa yoh myntoi na ka YESS Meghalaya.
Kiwi kiwa da em ha kani ka sngi toh u Montri ka chnat Sports & Youth Affairs, u Shakliar Warjri, u Commissioner & Secretary, Sports & Youth Affairs, u Dr. Vijay Kumar D waka Director, Sports & Youth Affairs ka Isawanda Laloo.
