I pynkhreh ka Seiñ Raij Jowai yaka Behdieñklam 2023 ka wow sdang nadooh ka 6 tarik uni u bnai da lai ko chakhmat ha ki rukom waphær waphær wei ynne ka sngi neiliang ki khlieh wa pynlai ka Seiñ Raij wa kynthup ya u President, u O.R. Challam, u General Secretary, u Arwotki Sumer wa u Pa Dolloi ka Elaka Jowai, u Puramon Kynjing uwa toh u pait yei kaam ñiam da khana ki hajrong i pynkhreh yong ki yaka Behdeiñkhlam kamjooh leh ki dak ki chin yong i lehñiam wada pyndep heiyatoh waka Behdieñklam.
U President ka Seiñ Raij Jowai, u O.R. Challam da khana u wa ka Behdieñklam katkam i pynkhreh wei katkam i yooluti ha uni u snem daw man kawa heh neibhah najrong ki khon ka Seiñ Raij wa em ha Jowai daw wan chimbynta lang leh sa kiwa em ha Ummulong, Shillong waka Seng Khasi Kmie.
Wei najrong kiwi won ki chnat sorkar wa yakrehlang ha kani ka Behdieñklam, kiwa hakhmat dooh toh ka NEC, ka chnat Tourism, ka Arts and Culture waka G20.
Kamwa i mut yong ka Behdieñklam hi toh hajrong ka yurim u beh yaka khlam, i kjut chitom wei sih wa boonjait haka imlang sahlang, u President khana u wa ha uni u snem won ka khlam wa hakhmat dooh wa hap yakhun toh ha samen samen, haka chnong ka thaw, ka jylla waka ri hi waroh kawi, wei khamtam ka khlam wa yoo maa dooh ha kini ki sngi toh i ngat ki khon khynroo khyllood ha u drugs, bhang wa kiwi ki jait dih wa sih.
Hawa kyruiñ won cha ki soodong sookun ka Syiem Aitnar kawa man ka thaw wa pyndep khaddooh yaka lehniam Behdieñklam wa jooh wan sakhi da ki phaw hajar ki paidbah khlieh-u-snem, da yoo yei kylla dur wa yoosuk yong ka hadien wa neiliang ka chnat Ministry of Tourism ka sorkar bei da yarap poisa ko u chna pynbha wei pynphooh pynphieñ ya ki soodong sookun ka Syiem Aitnar.
Harood ka Syiem Aitnar da sakhi leh ya kawi ka yung wa yoosuk wa tip kam ka Facilitation Centre, wei hapoh kani ka yung ki bru ye ki leh u pait ya ka Behdieñklam lyngba ka Screen najrong wow yoh ya kiwi won i emkaam hapoh kani ka yung deiwa bood katkam ki kyndon wa pynlai daka chnat krehkaam.
Tangwa ha uni u snem won ym pu ye u pynemkaam ka neibhah chapoh ym pu em dep chna lut nadong chadong wa kynthup nadooh ka Screen ki tanghæng wa kiwi. Wei ya kini ki jait chna waroh da pynkreh daka chnat Tourism yong ka sorkar jylla.
U President ka Seiñraij Jowai da pyntip u leh wa daw chna ki yaka thaw pynyieñ kari khnang yow kyllooid ka thaw booh kari kiwa chah khut sñiawbha heipor Behdieñklam katwa yaki khyllon pdiang sñiawbha ha laad Loomkyrwiang wa yingkieñ Myntdu toh kiwa da dep u chna.
Heijooh i por sñiawngooh u yaka chnat PWD wa ha uni u snem ki luti syngkieñ hapoh ka chong Jowai da man kiwa biang, ka chnat PHE kawa da pynbiang yaki um hapoh Aitnar, ka chnat pulit wa pynlai bait yaki kari wei kamjooh ka bor District kawa da ya krehlang waka Seiñ Raij waroh chisnem neibynta kawon kawon ka kaam khamtam heipor Behdieñklam.
Neiliang u Pa Dolloi ka Elaka Jowai won uwa pait yei kaam ñiam kaam rukom yong ka Behdieñklam ong u, katkam ki dak ki chin yong i pyndep ñiam hapoh ka Raij Jowai kawa da sdang nadooh u bnai Wisu wa kynthup yaka lehniam Thoh Langdoh, ka ñiam Chaad Thoh, ka Kñia Khang, i pyndep ñiam ya u Pa Pyrthat wa kiwi toh i lehñiam wada pdiang hun wei yooluti leh u ye u pyndep yaka Behdieñkhlam deiwa bha wa miat wei deiwa hun da waroh lang.
Kamtæ u General Secretary ka Seiñ Raij Jowai, u Arwotki Sumer kyntu u yaki paidbah u yakrehlang wa ka Seiñ Raij ha ki sngi Behdieñklam heiyatoh wa kiwon kiwon ki bynta khamtam ki luti syngkieñ neibhah wa daw em ki thaw wa daw booh No Entry katkam ki por waphær waphær, iwa boi ye u man i thut ya ki paidbah.
