U Montri Rangbah ka jylla, u Conrad Sangma ynne da e kti u ya ka chithi cha u Dharmendra Pradhan, Education Minister ka sorkar pyrdi heiyatoh wa 5 tylli ki phang wa emkaam kam i em boon kiwa sikai ki wym pu em pyndep ya ka Training, i emkaam hapoh NEHU, kiwa sikai SSA, ka NEP wa kiwi kiwi de.
Ha ka chithi da ong wa ka Meghalaya em ko chiboon kiwa sikai ki wym pu em pyndep ya ka Training neidaw wa duna ki thaw e sikai heiwa ka jylla em ko du 5 tylli ki College of Teacher Education (CTE) kiwa ye u chim du 350 ngut kiwa sikai ha ka chi snem tangwa kiwa sikai kiwa emkaam ki wym pu yoh ya ka Training da em ki 5548 ngut ha ki Secondary wa 2043 ngut ha ki Higher Secondary.
Da ong u leh wa ka jylla duna bor ko wow sdang leh ya ki B.Ed Course iwa katni da man iwa emkaam u pyndep yow ye u man kam kiwa sikai ha ki Secondary wa Higher Secondary.
Heiyatoh won waka Diploma in Elementary Education (D.El.Ed) kawa da wanrah neibynta kiwa da man kam kiwa sikai ha ki Primary wa Upper Primary School, da ong u wa da yarap bha ko heiwa kiwa man kam ki Untrained Teachers da chim ki ya kani kiwa da em 34,730 ngut ki Elementary Teacher wei da pyndep ki ha u snem 2013 hadooh 2019. Tangwa kattæ leh dang em bait boon ngut kiwa sikai ki wym pu em dep chah sikai wa em 18,900 ngut ki Elementary Teachers. Ka jylla leh em ko du 7 tylli ki DIET wa kawi ka Teacher Training Centre kawa ye u pdiang du 550 ngut chisien chim iwa da eh bha wow ye u e sikai ya kiwa dang sah.
Hajrong won ka NEP-2020, da pyntip u wa ka Meghalaya da pynkhreh ko wow pynkrehkaam ya ka tangwa dang em boon i duna wow pynchna u tei, kamtæ da paan yarap poisa yow pynchna pynmiat ya ki skur, ki Pedagogy Resource Training, ki ECCE wa kiwi kiwi.
Ya ki kaam won wa yatoh waka SSA, da ong wa na ka mang tangka kawa da booh nadooh 2018-2023 da man ko T. 3407.47 klur, iwa da pynlait won T. 2722.22 klur wei kawa da pynlut toh T, 2377.33 neibynta u 2018-2023. Wei ini mut i wa dang sah sa T. 685 klur na ka mang tangka ha kini ki san snem. Em leh i duna yong ka Annual Work Plan & Budget-PAB iwa ym ye ka jylla wow pyndap yeiwa emkaam ka NEP 2020 neibhah ym ye leh wow su tulop heipor wa biang, kamtæ da kyntu wow pyrkhat deiwi yei rukom bhah ya ka poisa wa wan na ka sorkar India neibynta ka SSA yow ye ka jylla wow bood ya ki kyndon ka NEP-2020.
Heiyatoh won waka NEHU, da pyntip wa dang thylli ka chuki u Pro-Vice Chancellor, u Registrar, u Finance Officer, u University Engineer kiwa da emkaam wow pyndap noh. Chooh chooh da ong wa i kyrdan u Controller of Examination da ksoh da u Ex-Army Officer uwa ym em tip chaphang ka puræ puthi. Wei da em leh 200 tylli ki kaam wa dang lait nadooh ki kaam yong kiwa sikai kamjooh kiwi ki wakreh kiwa katni da thung da kiwa kreh Contract donhi. Kamtæ ya kini leh da emkaam wow pyndap noh.
Ini da man i leh i jooh ha NEHU Campus wa em ha Tura kawa krehkaam deiwa tkoh neibhah ym em Pro-Vice Chancellor ko da slem bha. Wei emkaam leh u chna boon kiwi nadooh ki sarok, ki Street Light, ki Hostel, ki Quarter, ki Convention Centre wa kiwi kiwi de.
Da pyntip leh wa ka jylla da yoh myntoi bha ko naka RUSA 1.0 wa 2.0 yow pynchna pynmiat ya ki thaw puræ wei katni deiwa sdang biang ya ka PM-USHA, ka jylla Meghalaya man ko leh kawi na ki jylla wa yoh myntoi hadooh wow pyndap poisa neibynta ki University, heiwa ka State University ka Meghalaya leh toh kawa daw sdang noh tangwa ka Preparatory Grant wa kyrchaan ya ka State TSG ym em ko hapoh ka PM-USHA. Kamtæ manda pynkrehkaam ya ka NEP 2020, ka poisa naka PM-USHA daw pynmyntoi bha ko yaka jylla wei da kyntu ya ka sorkar wow pynyinsur ya ki kyndon yow ye ka Meghalaya u yoh myntoi hapoh ka PM-USHA.
