Ynne ka sngi da pynkup burom ya ki khynnah kiwa da lehbha ha ki Exam deiwa yoh yarap lyngba ka SSLC Free Coaching Programme 2022 ya kawa da kyrchaan poisa da u MLA ka Jowai Constituency, u Wailadmiki Shylla ha ka yalang wa da pynman ha Thomas Jones Synod College.
Ha kani ka yalang, u Wailadmiki Shylla da man u kam u kongsan katwa ka AP Syiem, DEO ka West Jaiñtia Hills da man ko kam ka symbood kongsan hei emlang ki MDC ka JHADC, ki khynnah skur wa ki manbei manpa.
Kani ka Free Coaching Programme toh kawa kyrpang wa da pynman ha u 2022 neibynta ki khynnah kiwa daw yaleh ya ka Exam SSLC hadien wa da chah ktah ki khynnah nei wan ka kjut khlam COVID-19 khamtam ki khynnah Class VIII hadooh Class X neibynta ka Maths wa Science. Ha kani ka Free Coaching da kular wa daw pynkup burom ya ki khynnah kiwa yoh Distinction ha kini ki Subject.
Ha kani ka sngi da pynkup burom kyrpang leh ya ka Larisa Lamin kawa yoh First Position ha ka HSSLC (Arts) wei da e khublei ko ya waroh kiwa da kyrchaan ya ka deiwa kitbok leh ya waroh wow em ki ka thong khlem randien deiwa e yei chaniah leh ha u Blai.
Ka AP Syiem hawa e yei klam da ong ko wa sñiawkmen ko wow embynta ha kam kani ka yalang kawa nyngkong dooh ha ka District wei dap ko dei sñiawkmen wow tip wa u MLA ka Jowai da pynman u kam kani ka e sikai khamtam ya ki khynnah kiwa wan na ki manyung kiwa duna hei yoh i laa.
Chooh chooh da ong ka wa ka Maths wa ka Science man ko ka Subject wa eh bha ya ki khynnah ymtoh du hapoh ha District tangwa ha ka jylla leh waroh kawi.
Da kyrmen ko leh wa neini chaphrang daw pynman biang ya kam kani ka e sikai.
U Wailadmiki Shylla hawa e yei klam da ong u wa sñiawkmen u wow tip wa boon ki khynnah kiwa da Pass bha lyngba kani ka e sikai kawa man kawa nyngkong deiwa e khublei ya kiwa sikai kiwa da kreh chitom.
Da ong u leh wa hanla em i duna wa boon ha i puræ puthi tangwa ka sorkar da yaleh ko wow pyndap yeiwa duna.
Da kynmoo u wa heipor wan ka khlam tæ ymtip yoh sakhiat ki yei stat i tip neibhah wa khang ya ki thaw puræ katwa kamtæ kini ki khynnah da poi ki wow yaleh ya ka SSLC yong ki ha uni u 2023 deiwa e Coaching dei mynkna.
Chooh chooh da ong u wa em hadooh 80% na ki khynnah kiwa chah hikai kiwa da Pass na kani ka Free Coaching.
Heijooh i por da kular u wa lada em kiwa yoh Top 20 ha ka SSLC wa HSSLC napoh ka Jowai Constituency u e burom u ya ki da ka Laptop namo lada em kiwa da em Laptop daw ye u e ya ki da ka poisa wei da kular u wow pynman ya kani ka e sikai man-u-snem katwa dang man MLA u.
Ya ka yalang da pynlai da u Ynniawki Paslein wei da yoh ya ki kyntien pdiang burom da e da u E. Suting, kwi kiwa da klam kynthup ki ya u Ebenzer Suchiang, i rwai na u Yatiplang Suchiang, katwa ya ki kyntien khublei da yoh na u MDC ka JHADC u O. Lamin.
