U Montri ka chnat Bordiñ, u Abu Taher Mondal da pyntip u wa da pynduna yei pyndooh bordiñ wei suki suki daw pyndam noh chisyndon.
Da ong u wa kamwa man kattæ da ye wow pynmih bordiñ deiwa biang wei manda pahooh daw pynbiang bordiñ neibynta ki paidbah khlem pyndooh.
Da khana u leh wa da ye u pynduna yei hap thied bordiñ na baar iwa da hap thied ini wa dep hei dor wa syad bha wei deiwa ye u pynduna yeini daw ye u pynduna leh yei pyndooh bordiñ wei katni i pyndooh bordiñ toh iwa du kattu katni por donhi.
Da ong u wa kamwa man kattæ ym pu em yoh ki laad ki luti wow lait na ini lada jia wym biang wan u slap tangwa da yaleh yow ye u pynmih bordiñ katkam i bor wa toh u pynmih ki thaw pynmih bordiñ wei ha ki snem wow wan daw ye wow leh yow pynwiar noh ya ini i chem chitom.
Kam wow pynkynmoo wa ini wa dep ka Meghalaya High Court da khyrwait ko ya ka sorkar wa duna hadooh 50% i pynmih bordiñ iwa da ktah yei khih i khan ki bru wei da phah leh ya ka sorkar wow khana kammon man i saam bordiñ ha kawi pa kawi ka District kamjooh wow thied bordiñ yow pyndap yeiwa emkaam ka sorkar.
U Montri da pyntip u wa ka sorkar ini wa dep da hap thied bordiñ ko hei dor wa syad bha iwa dapoi hadooh T. 3 klur chi sngi wei yow pyndap bordiñ da hap wow thied kat na wa yoh hadooh na ki Company ki bru samen.
Da pynche u leh wa hanla katni ka um ha Umiam da nang ku ko, dang hap hi wow pyndooh bordiñ toh neidaw wa hap pynuiñ yei bordiñ wa da yoh yarap na ki Company kiwa da yarap ya ka Meghalaya heipor wa duna u slap wei wa kini ki Company da em ka soskular wa da ya soi yow pynuiñ biang cha ki yeiwa da e ki.
Puræ leh: Ym ye pdiang wa palat 50% duna i pynmih bordiñ iwa da ktah lut yei khih ki bru: High Court
